縮皮王派利是攻略


舊曆年,我諗大家應該都準備咗一疊銀紙,預備呢十五日財神之旅嘞。(除咗我九成以上嘅毒男毒女friend之外:我真係恭喜你呀,唔使派利是。)

如果你個個都派廿蚊(或者十蚊),當然冇咩要諗,但係年中總係有啲人,又要派利是,又要諗過度過每封利是嘅效用呀,面子呀諸如此類。查實每樣嘢多人做嗰陣,責任就攤薄:就好似掃街掉垃圾落地,平時好礙眼,不過過年時節,周街都係垃圾,個個都揼紙巾、膠杯、甚至成袋垃圾落地都唔多覺。同樣,好嘢都係,大時大節,你俾廿蚊就同大家一樣,俾五十又唔見得特別疏爽。所以如果你諗住過年封利是大封啲,之後嗰年人哋會對你好啲,咁你真係要好大封至得。

平日收到五十蚊利是,無啦啦有錢落袋,大家會好開心;今日收利是,就老奉。多一百幾十都冇分別。唔同日子,就算現金嘅價值不變,喺人嘅心目中價值係唔同㗎。

所以如果你想派封大利是俾看更、recep、收銀、企堂、阿姐,記住唔好過年派。既然要派,就唔好派一封人哋收完都唔覺得特別開心嘅利是。真係要派,跟大隊,細細封就得。

當然我唔鼓勵呢種左手交右腳嘅換錢行為,不過參加得就盡量令利是達到最佳效果啦。

祝大家盡快加入老友記行列。