與其起底,不如留白


我記得十幾年前(2000年前後)玩newsgroup都識過啲朋友,好多時對方講自己嘅背景,返咩工呀,喺邊度住,做過乜,都係聽吓算。唔係個個都會講晒啲真嘢俾你知,中間冇作嘢都肯定有誇大、有保留。

印象最深刻係「小燕子」,一個聲稱係83年出世嘅學生妹,但係感覺、言談、學識唔似。當年得一張相,試過起底但係都起唔到啲咩(初時查到佢ip唔喺香港,後尾先識有樣嘢叫vpn)。呢個人係分身定係真學生妹,我哋一直都冇答案。可能佢真係學生妹,都有可能係師奶阿叔整出嚟嘅分身。但係諗返其實幾後悔起底:知道又點呢?對方想隱瞞一定有原因,何苦要迫人剝光豬呢。

到咗今日,網上傾嘢留低好多腳印,人同人交流亦唔只聲音文字,而係有相有片。加上Facebook大神嘅超龐大網絡,要放低部份過去,去識一班新朋友,加入一個新圈子,可能要易容至得。

時代唔同,要起底易咗好多,人好似冇咗逃避過去嘅空間。如果你身邊有啲新朋友,你覺得背景有啲可疑,公式年齡(好似好多女優噉)同外貌不符,個名轉嚟轉去,學歷或者身份有蹺蹊之類,不如你就當係佢cosplay緊一個角色,大家配合吓,唔好深究,隻眼開隻眼閉啦?

留返一塊遮醜布俾對方,功德無量。