無聊


想展示自己嘅美態,想趁青春留倩影,係人之常情。但係不論男女,放相上網硬係會有人批評,有指點,有單打,有公開評論,有圍內恥笑。面對呢啲事,堅強嘅人,會覺得係俾人針對,係人哋係唔抵得;懦弱啲嘅,就會覺得自己身材樣貌都及唔上人。係咪網上嘅人特別口賤,特別奄尖? 細心諗吓,其實唔係。留意返好多評語刻薄嘅人,要求唔係真係咁高。如果好過九成人嘅先至叫靚,噉即係有九成人唔到合格線,一出相就會俾人恥笑。但係實情大部份人放相上網,靚唔靚都好,大家都會開心俾like。每個人都心知肚明,世上真正靚嘅事物唔多,淨係得靚人靚景可以影相分享,實在太扭曲、太壓抑。所以一般嘅生活照,根本冇人會恥笑,冇人會鄙視。 咁有咩唔係生活照呢?就係特別chok嗰啲相。男又好女又好,你夾硬露個肚出嚟,件衫扯到肚臍咁低,或者夾到個胸成個壽桃咁樣之類,呢啲相我好難當係一般相去看待。我會當係一件藝術品去睇呢啲chok相。做得藝術品,就自不然會有人評論,用各人嘅審美觀去評價。 藝術品嘅美感,有好多元素。畫作嘅,直線歪嚟歪秤,顏色唔勻循,形狀唔啱比例嘅話,有聲音嘅,爆咪呀、拆聲、有雜音嘅話,係啲微細嘅問題,但係會大大影響成件事嘅可觀度。呢啲嘢都係可以控制嘅,之不過當你嘅藝術品係你自己,咁你嘅面相、身形等等,就會有好多控制唔到嘅因素。 要塑造真人嘅美感,好多時要靠想像。如果有一啲大家自覺唔夠完美嘅地方,其實朦朧啲,留返少少空間,大家可能會覺得更加好睇。如果唔想太矇,而要用到化妝/衣着/特技去營造美感,都冇所謂:只要冇太多穿崩位,我都會運用我嘅想像去欣賞。 不過如果影到粉底兩截色,胭脂唔均勻,胸型同弧度有差距,咁就會好似啲人拍古裝片但係個頭套冇戴好,假髮邊有一條凹凹凸凸嘅皺摺噉,就算用咩觀賞角度,我都好難腦補到一個靚嘅畫面去欣賞㗎。既然係藝術,不如俾多少少心思,做得再賞心悅目一啲吖?

放得啲靚相出嚟嘅,可唔可以唔好咁多穿崩?


當你好想要一樣嘢,其實你知道你一定唔會攞得返,但係都會做啲形式上嘅嘢。好似想好天就掛晴天娃娃;過年想風調雨順就掛個倒轉嘅福字。當攞個意頭又好,表達自己嘅思念又好啦。 失去咗嘅嘢,更加之係噉。 無論係咩年紀嘅人,每次要跳去一個新嘅地方,挑戰新事物,除咗興奮之外,都難免有少少失落。有時要成功,要付出無比代價,就算冇放棄到家人、朋友、理想、道德,最少都一定犧牲咗唔少時間。 歲月不饒人。時間係追唔返嚟嘅嘢。中學生會懷念小學嘅幼稚;大學生會懷緬未成年嗰種無牽無掛;中年人會記掛大學生嗰種勇往直前。踏入晚年,究竟我會掛住邊樣自己失去咗嘅嘢? 我都唔知。 今日睇到一張宣傳海報,我諗我知道佢掛住啲乜喇。我祝願佢贏返佢想要到嘅嘢啦。

歲月不饒人


December 4, 2016 at 7:23pm · If you’re reading this, even if we barely talk, comment with a memory you have of us. After you’re done, post this on your wall. You’d be surprised with what people remember about you! 如果你有緣睇到呢幾句嘢,就算平時同我冇乜兩句都好,都喺下低寫一樣有我份嘅回憶吖。做完記住post埋去自己埲牆喎。見到人哋記得你啲乜,隨時會嚇你一跳㗎。

留言講回憶



November 29, 2016 · 大家有冇用過ICQ, MSN, Xanga, Sinagirl, 迷你論壇, Show Happy, HKFlash ? 入面啲資料仲喺唔喺度? 有時放晒啲嘢喺同一個地方,過咗十年唔用,莫講話login,隨時連嗰樣嘢叫乜都唔記得。要長期保存嘅,都係自己收好,或者印晒啲嘢出嚟穩陣。

HKFlash 同 Show Happy


September 9, 2016 今朝返早,我搭咗架冇乜人嘅巴士。有一個人企喺我隔離好耐,我望一望佢,個樣有啲陽光氣息,冇化妝,又冇着裙,着住件鬆身嘅T-shirt,貼身長褲,短頭髮,冇紥起嘅,打扮清爽。 初時我都冇理佢,但係喺我就快落車嘅時候,佢忽然同我講:「早晨。你知唔知道⋯⋯ 2016年9月6日,奧林比安正式退役喎。」 呢種打招呼嘅方式實在殺我一個措手不及。我發晒吽逗,問佢,「邊個嚟㗎?」 「奧林比安,AV531,9月6日,完成89B,就正式退役。」 喺佢眼中我睇得出一絲傷感。我諗咗一陣,奧林比安係邊個,Okubayashi Hian? 可能係我唔識嘅女優啦。89B 我確實係唔會有興趣。但係一個陌生人望住我,講啲咁嘅嘢,的確係有啲尷尬。 雖然我都未聽得明,之後我就落咗車喇。回頭一望,見到佢着件衫上面,寫住乜乜 Mental Health。我諗或者太過鍾意一樣嘢,都可能係病嚟嘅。不過我鍾意讀書、模型、音樂、漫畫,有邊一樣唔係噉?愛一樣嘢愛得好深嘅話,其他人未必聽得明,甚至會以為你有病。 雖然佢嘅奧林比安退咗役,不過我都希望佢唔會傷心太耐啦。 #冇攞contact #唔知會唔會share到佢本人見到呢

我係一個毒男,今日第一次搭巴士有人搭訕


August 25, 2016 · 今日,有朋友問我下面兩個問題: ① how come peppa pig only have yea yea ma ma and no gong gong por por ② 小丸子 only have yea yea ma ma and no gong gong por por (點解兒童動畫《Peppa Pig》同《小丸子》都得爺爺嫲嫲,冇公公婆婆嘅?) 首先,Peppa 係豬,你唔可以用人類嘅道德觀去理解。其實豬爺爺,就係豬公公;豬嫲嫲,就係豬婆婆。例如喺 Season 3 Episode 19 (#124 Granny pig’s chickens) 入面,豬嫲嫲帶咗 Peppa […]

關於Peppa Pig 同 小丸子兩點疑問



August 22, 2016 · (前言:聽朋友林非講,話見到土生土長嘅香港細路用支話(即係普通話)溝通,覺得不寒而慄;跟住有人就話佢哋係新移民、雙非、黑工子女,講到好似覺得真香港人冇事,唔使擔心噉。我覺得我要講吓自己對呢個現象嘅睇法同對策) 香港一向都多新移民,主權移交之後可能再多咗。但係以往嘅人喺學校、喺社區都會用粵語溝通,至少喺兩個人講唔同家鄉話嗰陣,粵語會係最正常嘅交際語。家吓呢,係成日見到兩個粵語人,用普通話溝通。就算次次你都話佢哋係新移民,一樣令人憂慮。何況而家已經去到土生土長香港人都噉樣做。 講到語言,一般人就冇乜腰骨,亦都難怪。「語言用嚟溝通」呢個概念好根深蒂固。否則我哋粵語邊度嚟咁多借詞先?大家關心內容,多過關心你用乜嘢話,所以轉台,一般人根本就唔會察覺,更莫講話會覺得唔妥嘞。 當然你可以話有容乃大,我哋應該接受香港係文化多元乜乜物物,所以多幾隻語言冇所謂。我知道有啲人好buy呢套:覺得只要保持到香港嘅特色,入面啲餡應該換乜都得。呢種心態好牙煙嘅。你叫全部香港人轉講港式英文溝崔世安式普通話,創造一種新混合語,我肯定會繼續保持到個「香港標籤」,但係我哋真係淨係要呢個標籤就夠?冇咗啲內涵都得?外來文化入侵、同化,其實從來都係咁做。迫你學,等你對呢種外來嘢習以為常,但係永遠將佢講成係高等啲嘅,跟住社會上個個仆到去學「高等文化」,之後慢慢溝淡晒原有嘅嘢,淪為外來文化嘅在地版。在地化咗嘅外來文化,更加難摵甩,更加易入口,你睇 Singlish 、台灣國語幾咁強勢? 仲有人會話,只要我講普通話保留到強烈口音,就可以令對方就範,就保護到自己嘅語言。你可以睇返上面。變種而在地外來文化係更加容易消滅自己嘅,呢啲破滅之道唔好行呀。 (離晒題添。) 而家係一種兩難嚟嘅。 如果大家純粹想要一個標籤,噉入面嘅嘢唔重要,細路出街講普通話、英文都冇問題。但係香港文化嘅定義就會過度多元,變咗一個無限漂移嘅龍門;如果你用日常講「廣東話」做指標,噉你就一定要排除好多人,要將好多香港土生土長嘅人當係文化上嘅外人、非香港人。 單單當廣東話係Shibboleth —— 識講就係香港人,唔講就係外人,係完全搞錯咗個問題。因為好多香港人係明明屋企講廣東話,出街都係要用普通話。識講而唔講,一樣係留唔住。 我哋要填返上面個 gap。唔好呃自己香港係咩多元社會,文化上今日嘅香港係以粵語為主軸。同時要承認,有一班香港人,佢哋嘅生活係偏離咗香港嘅主流,融入咗中國。 想保持到香港現存嘅語言文化,至少要鞏固一大班同時遊走於粵語文化同中國大陸點圈嘅人,而對粵語/廣東話嘅責任感係其中一點。 作為起步,我哋至少應該推廣以下幾點: 1)粵語族群,有責任認識並推廣粵語; 2)粵語母語者之間,溝通上應優先使用粵語; 3)盡量用粵文書寫; 4)避免接觸普通話資訊,以免粵語受單一語言影響; 5)生兒育女,同仔女溝通淨係用粵語; 6)鼓勵唔識粵語嘅人學習粵語。 上面六點,聽落好溫和?對好多人而言已經係終極法西斯。 不過點都好,希望大家試吓做。 圖:鴕鳥

我唔信!講普通話嗰啲一定唔係香港人!


August 14, 2016 · 如果 #愛就係選擇,你揀嘅每樣嘢都應該反映住你所愛,人生應該充滿愛先至係。點解人世永遠充滿恨呢? 因為【愛】係理想入面你想揀嘅嘢,但係現實上我哋受物理限制,你冇可能每次都準確攞到、㨂得切正確答案。所以【選擇】唔係愛,而係經過讀取錯誤、延遲或者錯手等等實際問題過濾之後嘅投射。 愛同愛嘅投射之間時時會出現偏差。如果你唔老實,唔夠膽面對自己嘅諗法,好易就會違心而行,不斷揀啲唔愛嘅嘢。 所以[愛就係選擇]並唔係真理,而係目標,係要時時提住自己,日日誦念嘅戒條。呢個目標唔易實踐,唔少人成世人都做唔到。

如果愛就係選擇


August 2, 2016 · 要說服大眾,唔係要由理論入手。而係要自己友個個都有咁上下魅力。魅力唔係講嘢叻就得。你理論萬能,寫文曉飛都好,企到出嚟原來係殘師奶,係肚腩大叔嘅話。唔好意思,你註定係會冇人理。 記住: 男嘅要整潔要有型。 女嘅要識打扮要靚女。 唔係我 #物化男性 #物化女性 ,而係人類本性如此。 你諗吓如果陳雲係廿零歲嘅肌肉型男,會幾咁震撼? 總之大家一齊改善外表、操fit自己啦。 理論唔入屋唔緊要,外表入屋咪夠。唔通你改變個理論去遷就選民咩? #反肚腩太聯盟 #以貌取人協會 #韓國近了你們應當悔改

魅力論



July 3, 2016 · 前排喺某個朋友聚會玩咗一個遊戲,叫做【國城食職】。呢個遊戲,每人有一張 A4 紙、一枝筆,就玩得。下面係引進者 Laurent Chan 嘅玩法。 玩法非常簡單,首先一個人要求其抽個字母(擲骰又好,乜都好,我哋嘅做法係叫 某甲 由 A 開始數英文字母, 某乙嗌開始,甲就開始數,乙嗌停,甲就講個字母出嚟)。跟住大家就要諗呢個字母開頭嘅 「國家」「城市」「食物」「職業」。 e.g. 假如個字母係 S,你嘅答案可以係 「Somalia 索馬里」「Seoul 首爾」「Sugar 糖」「Shepard 牧羊人」噉。第一個人答完,倒數 20 秒後所有人停筆。 之後,大家輪流報答案。如果係獨一無異嘅答案,得10分,有重覆,得5分,唔啱嘅答案,冇分。每 round 最多 40 分。 你用英文名玩又得,用粵拼又得。變化好大。你鍾意將「職業」變做「街名」「歌星名」都得。 大家試下玩,跟住講吓感想。

超簡單聚會遊戲介紹:國城食職