名流青史嘅仆街仔

以下故事純屬虛構 如有雷同實屬巧合 「呢排我喺度諗,每日都有咁多首歌派台,一年都有幾百首歌,但係你問返我十年前有咩歌,我都淨係記得〈火熱動感la la la〉咋。」 講呢番話嘅係我同學亞星。亞星可能有少少印度血統,塊面黑古勒特,講嘢頗有哲理嘅。不過睇樣真係唔知,其實佢有玩樂器,仲係個型到爆炸嘅rapper嚟。 「就算一首歌幾出名,幾十年後咪又係冇人識?就算紅到好似Twins同Yumiko噉呀,十年後都肯定唔會有人聽呀!」 於是我問亞星:「咁你係咪想上位,要寫首過幾十年都仲有人識嘅歌?」 「梗係想啦屌你」亞星開始講重點:「但係就算錄咗首歌,噉又點?寄去電台?用ICQ分享出去?」 呢個時候精通電腦嘅飛哥就話嘞:「錄歌冇用㗎,你睇AV會唔會淨係聽聲吖?你唔要畫面嘅,我用錄音機錄低啲叫牀聲得啦,唔使用real player啦,唔使整 windows 2040碟啦。」 「即係要玩拍片,錄埋MV?」 「係。而家越嚟越多人用寬頻,我敢講十年之後影片會取代聲音,大家唔會再用 CD、MD。如果我哋拍到第一段學生rap,做到元祖,我肯定過多十年、廿年、卅年,都仲有人睇呀!」 名校生嘅叻,唔只係有遠見,而係行動力超班。亞星即刻拎咗佢最新作出嚟。「就呢首啦。〈拔萃有個大仆街〉」 「肯定會名震四海。以後一講DBS,就諗到大仆街,仲有陳廷佳呀!屌,諗都覺得爽呀。林子祥都唔夠我哋嚟呀!」 二〇〇三年嘅春天之後,拔萃唔再一樣。 拔萃有個大仆街 大仆街 大仆街 佢個名叫做陳廷佳 陳廷佳 陳廷佳  成日嘰嘰趷趷又唔知自己好撚柒柒 真係好撚柒 我睇到佢實揼實  成日係呀係呀 其實霎下霎下  又話我阿爸 話有你真係好撚麻煩  我屌啦(屌)你知唔知 知唔知對住你好撚艱難呀  Let’s say https://viagraforgreece.com/! 屌屌屌屌屌你 屌屌屌屌 屌屌屌屌 屌你 屌你 屌屌屌屌 屌你 屌你老母 屌你老母 陳廷佳 屌屌屌屌 屌你 屌你 屌屌屌屌 屌你 屌你 屌你老母 屌你老母 陳廷佳 陳廷佳

Read More »

洗腦營

心理學有咗百幾年,由 Pavlov 嘅 conditioning 開始,早就知有一大堆嘢,可以造成永久創傷,然後又可以再進一步用呢啲嘢嚟灌輸假記憶、制造團結假象。各種宗敎、保險、傳銷公司都用類似策略,而中招嘅人就明白呢啲原理,都未必發覺到。 咁有效嘅嘢,大家又點會放過呢?保良局訓練營睇嚟就用咗呢堆技巧嘞。 (推上報) 保良局訓練營的惡行:https://lihkg.com/thread/152919/page/5?ref=ios 大家睇路。集體訓練有得唔去就唔好去喇。 (講起,新加坡軍隊年年都有「燒信」環節,都係用同樣方法訓練士兵㗎。效果好到不得了。)

Read More »

晨星、晚星

讀語言哲學嘅時候,經常提到「晨星(morning star)」同「晚星(evening star)」,呢個由 Frege 提出,去區分「意思(sense / Sinn)」 同「指涉(reference / Bedeutung)」 嘅例子。天矇光見到嘅星,同日落見到嗰粒,其實都係金星,兩樣嘢所指嘅係同一事物,但係我哋可以用兩個方式去描述佢,雖然同樣都係指「金星」呢樣嘢,有同樣嘅指涉,但係兩個叫法,各自有唔同嘅意思:即係話,名同意思,並唔係一個一一對應嘅關係嚟嘅。 呢個講法或者同子路講「必也正名乎」有同樣嘅道理,不過講到星象,現代嘅學生又點會明呢?香港光害咁嚴重,就算入面天文學會,都肯定唔會為咗唔知幾光年以外嘅繁星,放棄成個森林啦。要大家諗明啲星星,實在太多強人所難。 不過今日,喺飯堂,我終於諗通咗。 今日我朋友買咗一個「橋村雞扒飯 (Kiu Chuen Fried Chicken Rice)」,我眼前呢碟飯係無比嘅熟悉。呢個飯佢化咗灰我都認得佢,根本就係前幾日俾貴幾蚊嗰款「韓式炸雞飯 (Korean Fried Chicken Rice)」嚟嘅。換過個名,但係背後所指依然係同一款,加咗辣醬嘅炸雞柳飯。但係不知名嘅橋村,淨係諗到鄉下、落後;同韓國一比,男嘅諗諗Twice,女嘅諗諗Exo,頓時覺得啲雞肉爽口彈牙,飯粒齒頰留香。背後嘅指涉係咩都好,改返個靚名,呢啲咪sen屎囉。 後記: 跟住我返去一查,原來橋村唔係「Kiu Chuen」,而係大韓民國嘅「Kyo Cheon」,即係兩個名唔係「晨星」「晚星」嘅分別,而係一個係「星」,一個係「維納斯」。我有眼不識泰山,以為「維納斯」係小農嘅產物,所以我就走晒寶。名可以有好多,但係有真材實料嘅,一樣好似漆黑中嘅螢火蟲一樣,咁鮮明,咁出眾。以後食炸雞唔使出銅鑼灣,落飯堂就得喇。喺馬料水食飯,真係幾咁幸福呢你話。 Frege, Gottlob. “Über Begriff und Gegenstand” in Vierteljahresschrift für wissenschaftliche Philosophie, XVI (1892): 192-205

Read More »

與其起底,不如留白

我記得十幾年前(2000年前後)玩newsgroup都識過啲朋友,好多時對方講自己嘅背景,返咩工呀,喺邊度住,做過乜,都係聽吓算。唔係個個都會講晒啲真嘢俾你知,中間冇作嘢都肯定有誇大、有保留。 印象最深刻係「小燕子」,一個聲稱係83年出世嘅學生妹,但係感覺、言談、學識唔似。當年得一張相,試過起底但係都起唔到啲咩(初時查到佢ip唔喺香港,後尾先識有樣嘢叫vpn)。呢個人係分身定係真學生妹,我哋一直都冇答案。可能佢真係學生妹,都有可能係師奶阿叔整出嚟嘅分身。但係諗返其實幾後悔起底:知道又點呢?對方想隱瞞一定有原因,何苦要迫人剝光豬呢。 到咗今日,網上傾嘢留低好多腳印,人同人交流亦唔只聲音文字,而係有相有片。加上Facebook大神嘅超龐大網絡,要放低部份過去,去識一班新朋友,加入一個新圈子,可能要易容至得。 時代唔同,要起底易咗好多,人好似冇咗逃避過去嘅空間。如果你身邊有啲新朋友,你覺得背景有啲可疑,公式年齡(好似好多女優噉)同外貌不符,個名轉嚟轉去,學歷或者身份有蹺蹊之類,不如你就當係佢cosplay緊一個角色,大家配合吓,唔好深究,隻眼開隻眼閉啦? 留返一塊遮醜布俾對方,功德無量。

Read More »

縮皮王派利是攻略

舊曆年,我諗大家應該都準備咗一疊銀紙,預備呢十五日財神之旅嘞。(除咗我九成以上嘅毒男毒女friend之外:我真係恭喜你呀,唔使派利是。) 如果你個個都派廿蚊(或者十蚊),當然冇咩要諗,但係年中總係有啲人,又要派利是,又要諗過度過每封利是嘅效用呀,面子呀諸如此類。查實每樣嘢多人做嗰陣,責任就攤薄:就好似掃街掉垃圾落地,平時好礙眼,不過過年時節,周街都係垃圾,個個都揼紙巾、膠杯、甚至成袋垃圾落地都唔多覺。同樣,好嘢都係,大時大節,你俾廿蚊就同大家一樣,俾五十又唔見得特別疏爽。所以如果你諗住過年封利是大封啲,之後嗰年人哋會對你好啲,咁你真係要好大封至得。 平日收到五十蚊利是,無啦啦有錢落袋,大家會好開心;今日收利是,就老奉。多一百幾十都冇分別。唔同日子,就算現金嘅價值不變,喺人嘅心目中價值係唔同㗎。 所以如果你想派封大利是俾看更、recep、收銀、企堂、阿姐,記住唔好過年派。既然要派,就唔好派一封人哋收完都唔覺得特別開心嘅利是。真係要派,跟大隊,細細封就得。 當然我唔鼓勵呢種左手交右腳嘅換錢行為,不過參加得就盡量令利是達到最佳效果啦。 祝大家盡快加入老友記行列。

Read More »

ADHD

見到辣椒話俾人問有冇 ADHD,心思思走去 http://adhd.hk 做測試。自我評估唔多可靠,我又冇做過正式評估,不過佢話專注力不集中我都好認同。專注力不足好大鑊,要用好多方法搞⋯⋯ 我來來去去都係嗰幾招。divide and conquer 係我最好嘅朋友。寫五千字嘅文就拆做一堆細目標,搵資料呀、寫大綱呀、分段1234呀、頭頭尾尾呀,再用啲印仔呀貼紙呀汽水呀呢啲獎勵自己,喺唔好增加太多context switch 嘅前題下跳嚟跳去,等自己不時可以享受吓完成工作嘅滿足感。 就算做唔到任何嘢,我都盡量做啲「指定消遣活動」,寫吓廢文,學吓語言,做啲project仔噉,好過乜都唔做齋睇電話吖嘛。

Read More »

「好撚樣衰」

前幾日見到有朋友講「砂紙論」,好好笑不過勁物化女性,我覺得笑完之後都要平衡吓。 人係有靚有唔靚,不過講到 cosplay 大家就真係唔好淨係睇樣。個樣唔太標緻都好,只要唔好太甩皮甩骨,有細心打扮過,模仿到原作神韻,我覺得ok㗎喇。唔通個個都 Enako,通街都長澤苿里奈咩? 今次如果係一個普通女仔,肯定冇咁多負皮。而家只要立場啱傾嘅,有眼耳口鼻已經可以變女神;立場同自己唔夾嘅,靚到揼一聲一樣係雞係公廁。 大家試吓學識用吓幻想力,搵啲靚嘅地方去睇,唔好理啲瑕疵,噉你就會覺得其實好多可觀之處。 好多「女神」我都係噉樣至欣賞得落㗎咋。

Read More »

逃避可恥⋯⋯

我至少有三個朋友寫文講《逃恥》。有人用日本文化角度去切入;有人講互相理解;有人唔知講啲乜。我諗一講到藝術(對我嚟講有美感嘅嘢我就當係藝術,新垣結衣又真係好靚),用唔同角度會睇到唔同嘅嘢,每一次觀賞、每一次分享,都係對藝術品嘅詮釋。 作為「毒男韓劇」,⋯⋯ 【廣告 1】 <https://goo.gl/forms/ITHvZYgtiOFR5cb33> 【廣告 2】 <可以放 ASCII ART 一幅> 其實唔係呢套劇先至有,而係大量日劇共通嘅,就係〖唔好睇少妄想嘅威力〗。故事一切嘅美好結局:靚女搵到毒男歸宿,同性戀嘅人搵到另一半,型男熟女可以喺埋一齊,首先都係佢哋有幻想,跟住真係開口,然後(因為劇情需要/日劇主旋律/左膠劇人人都有不死光環/十二集要去到BBQ狀態)所有人都幸福快樂咁生活落去。 一切要開始到,首先你要對未來有幻想嘅空間:女仔要覺得求婚嘅話對方會接受;毒男要想像到原來魔法學校有得畢業;熟女要理解到原來骨質疏鬆唔代表唔可以食型男;同性戀男要明白原來網友都可以開花結果。 未來有無限可能性,但係可能性係由幻想去開拓出嚟。如果你連幻想都唔識,咁就算新垣結衣上門向你求婚,你結果都係會用法官大人 say no。 (逃避可恥,但係會變出一個Facebook status。)

Read More »

預言家嘅最高境界?

有人話,如果911之前預計到會出事,提出要加強檢查,就算因爲咁做避免咗恐怖襲擊,都一樣會俾人鬧爆:因為避免咗就冇人會知,有大量檢討分析之前,大家唔會知道呢個做法嘅價值。 但係成功嘅預言家其實唔一定要預測得準㗎。成功可以係因為你嘅預言夠引人入勝,大家聽故仔已經聽得好過癮。講完怕唔中點算呢?我知道兩個方法。 ① 向唔同人提供唔同嘅預測 十幾廿年前我喺度諗,如果我收集到全港馬迷嘅email,每次 3T 我都 send 唔同嘅組合出去,中咗的話對方會當自己神咁拜,唔中嘅話封email就石沉大海。咁樣你嘅預言唔使準,大包圍完,其中一路中就夠。呢招係啲賭波貼士網常用手段。 ② 我一講就唔靈 如果已經聚集咗一班信徒,再冒險講太多預言,一定會出事。如果唔想講太多阿媽係女人嘅嘢,其實你可以照樣預言。例如可以話「我預測到一月尾香港會有天災,會凍死人」,不過要補多一句,「講出嚟大家或者可以避過一劫」,就萬無一失嘞。如果扑中,大家會覺得你料事如神,唔中嘅,就可以話一切係因為自己幫大家趨吉避凶。公係我贏字係你輸。呢招係啲KOL或者風水佬常用招式。 你哋有冇遇過呢兩類預言家呢?

Read More »

年終回顧

通常大家去到年尾大家都會回顧吓全年嘅目標,已經一月三號,我遲咗少少,不過遲到好過冇到啦。 返去三年前。 2014年我做咗好多轉變:簡單噉講就係決定轉行做廣東話嘢。加入港語學,創辦粵典,九月起開始教粵語,開始寫文(當然計量就拍馬都追唔上各大KOL)再周圍投稿俾網上媒體,轉用MacBook,開始用Instagram同twitter。 去到2014年尾,喺好多朋友幫忙下,確實做咗一堆嘢:粵典正式開工,準備領先地球嘅港大粵語Facebook page啟用,寫咗幾十篇 Facebook語言學/粵語科普文,同埋定咗一堆好得意嘅目標,世界向緊更加有趣嘅方向發展㗎。 2014年呢堆目標包括:整粵語水平試,推廣粵文書寫,推廣粵拼打字,寫好三萬個基本詞條,整學字咭,整粵譯故仔書,同埋寫一本關於學語言嘅書:《學極都唔識》。唔知有邊樣會做到落去呢? 2017年會變成點?我真係好在意呀! (我唔鍾意回顧嘅查實。回顧就係用舊有嘅記憶去重新創作,寫一個自我感覺良好嘅narrative出嚟,再修改返原有記憶之嘛。)

Read More »