世界可唔可以轉慢啲?

世界真係變得快咩?由「一般人有得上網」,去到「全世界冇得唔上網」,中間我諗至少隔咗十年;話而家周圍都係地鐵,但係啲地鐵站、酒吧、西餐廳都唔係失驚無神彈出嚟,可能係提早幾廿年已經話要起,用咗五六年先至有。每一樣大家話轉變快嘅嘢,都係逐少逐少變出嚟嘅。

Read More »

粵文今後路向

《學苑》最新一期,提出香港新文學論,大概意思係香港發展文學應該跳出書面中文嘅框框,可以改用香港話——真正屬於香港人嘅語言文字——去寫作。雖然內文並冇明言乜嘢係香港話,但係今期每一篇都以漢字書寫,詞彙句式均符合粵語習慣,可以睇得出《學苑》一眾編輯心目中嘅香港話,就係呢隻以粵語為基礎發展出嚟嘅語言。

藉住《學苑》帶起嘅思潮,我想喺度回應三個問題,希望會俾到少少方向大家。

Read More »

A for athazagoraphobia

《而家嚟見你》(いま、会いにゆきます)呢本書講咗個童話,話人死咗之後,並唔係即刻消失,而係去咗「厄楷乎星」,大家嘅靈魂會喺度暫存。只要你仲留喺大家嘅心入面,你嘅靈魂會繼續存在;但係有一日全世界都唔記得你,噉你就由「厄楷乎」消失嘞。

Read More »

單支鋤大D

為咗睇清楚鋤D嘅真締,我想介紹一個鋤大D嘅新玩法:「單支鋤大D」(請用叮噹聲線讀出)。大家冇得出啤、三條、一堂,淨係准出單支,逐隻搣。原先玩法可以出唔同組合,其實只係俾大家喺四種出牌模式之間轉換,令到大家多少少走盞:冇大牌嘅,拎住孤兒寡婦嘅,都未至於必死無疑。

不過現實唔到你揀,如果手牌轉唔到章,噉點算?呢個就係單枝鋤大D要你思考嘅問題。喺呢個遊戲入面,每用一隻牌都有雙重意義:你消耗一隻牌嘅同時,亦都係幫自己爭取緊話事權。到底你係俾機會令其他細牌發揮價值,定係純粹減少緊牌數?究竟你係虛耗時間定係為日後鋪路?如果你出嘅係♠2,你梗係想佢發揮功能,你出嘅係♣4,本身都冇得發圍嘅嘢,自然係想減輕負擔。但係如果係10呢?J呢?如果我用咗啲中上游嘅牌,結果換唔到優勢,仲俾人食住上,噉我係咪浪費咗呢啲牌?

Read More »

晨星、晚星

讀語言哲學嘅時候,經常提到「晨星(morning star)」同「晚星(evening star)」,呢個由 Frege 提出,去區分「意思(sense / Sinn)」 同「指涉(reference / Bedeutung)」 嘅例子。天矇光見到嘅星,同日落見到嗰粒,其實都係金星,兩樣嘢所指嘅係同一事物,但係我哋可以用兩個方式去描述佢,雖然同樣都係指「金星」呢樣嘢,有同樣嘅指涉,但係兩個叫法,各自有唔同嘅意思:即係話,名同意思,並唔係一個一一對應嘅關係嚟嘅。 呢個講法或者同子路講「必也正名乎」有同樣嘅道理,不過講到星象,現代嘅學生又點會明呢?香港光害咁嚴重,就算入面天文學會,都肯定唔會為咗唔知幾光年以外嘅繁星,放棄成個森林啦。要大家諗明啲星星,實在太多強人所難。 不過今日,喺飯堂,我終於諗通咗。 今日我朋友買咗一個「橋村雞扒飯 (Kiu Chuen Fried Chicken Rice)」,我眼前呢碟飯係無比嘅熟悉。呢個飯佢化咗灰我都認得佢,根本就係前幾日俾貴幾蚊嗰款「韓式炸雞飯 (Korean Fried Chicken Rice)」嚟嘅。換過個名,但係背後所指依然係同一款,加咗辣醬嘅炸雞柳飯。但係不知名嘅橋村,淨係諗到鄉下、落後;同韓國一比,男嘅諗諗Twice,女嘅諗諗Exo,頓時覺得啲雞肉爽口彈牙,飯粒齒頰留香。背後嘅指涉係咩都好,改返個靚名,呢啲咪sen屎囉。 後記: 跟住我返去一查,原來橋村唔係「Kiu Chuen」,而係大韓民國嘅「Kyo Cheon」,即係兩個名唔係「晨星」「晚星」嘅分別,而係一個係「星」,一個係「維納斯」。我有眼不識泰山,以為「維納斯」係小農嘅產物,所以我就走晒寶。名可以有好多,但係有真材實料嘅,一樣好似漆黑中嘅螢火蟲一樣,咁鮮明,咁出眾。以後食炸雞唔使出銅鑼灣,落飯堂就得喇。喺馬料水食飯,真係幾咁幸福呢你話。 Frege, Gottlob. “Über Begriff und Gegenstand” in Vierteljahresschrift für wissenschaftliche Philosophie, XVI (1892): 192-205

Read More »

抽水嘅正義

其實咩產品都好,本來應該都唔介意抽水。抽水呢啲嘢進可攻退可守,好笑嘅大家開心又提高知名度,抽完,對家睇得明、唔開心,講句sorry,一兩日就冇事啦。但係點解大家變得連水都唔夠膽抽?你以為係因為政府,因為建制,因為五毛黨? 大家唔敢抽水,係因為自命本土、民主嘅人冇腦呀。 人哋做生意嘅,抽完爽完就縮,笑完梗係走啦。抽一次水你就當人交投名狀,老奉要一世都企你嗰便,下次唔抽,或者因事縮沙,你唔撐不特止,仲杯葛返轉頭。大佬我下次仲點敢企你嗰便呀?點敢笑政府呀?乜都唔做仲好得過啦。

Read More »

小男人周記3影評--不含劇透

後生啲嘅觀眾未必知,其實《小男人周記》係三十幾年前嘅經典廣播劇(即係喺收音機定時播放嘅連續劇)。貼地得嚟不失故事感,紅到改篇咗做電視劇,出咗小說,拍咗兩套電影。本小說係袋裝書嘅代表,據講本本銷量過萬,係一代人嘅回憶嚟。 經典嘅故事隔咗咁長時間,再拍一套新戲效果會點呢?好多朋友係抱住睇爛片嘅心態入場:有一堆爛戲嘅元素:大胸女主角s(至少兩個,另外兩個唔知),上畫前幾段超爛gag短片,名作續集,蕭定一(大家仲記唔記得3D肉蒲團?);我就多少有啲期待嘅。 撞正賀歳片檔期,網上宣傳嘅定位,將呢套戲包裝成一套金句式、狗屎垃圾斬埋一碟嘅喜鬧劇,又或者係《世界零距離》-方東昇+詹瑞文×王晶。用「我要睇完笑到碌地」嘅心態入去睇,你一定會好失望,因為入面啲gag喺trailer度已經俾晒你睇咁滯。呢套根本唔係笑片,而係一套溫馨小品。如果要比喻嘅話,大概有啲似睇輕鬆日劇(例:逃恥 a.k.a. 月薪嬌妻)嘅感覺,你明知一切都會大團圓結局,但係睇嘅途中會覺得自己同主角有啲相似,入面遇到嘅人又好似自己啲朋友噉(性格,唔係身材),會有好強烈共鳴,會想為主角打氣噉。唔會睇到你喊,不過都會有種溫暖嘅感覺。當然,小品意味住唔一定係完整故事,主線唔會特別明顯,訊息、大道理都欠奉。睇開戲嘅朋友,未必接受到咁淡茂茂嘅情節;但係放低評戲嘅心態,睇完會有種舒暢嘅感覺。 如果係冇睇過之前兩集嘅話,睇完之後你好似覺得,喺Facebook/IG度follow咗啲角色,知道咗佢哋生活,見到佢哋開心自己都開心埋一份噉;如果你好熟原本嘅故事,呢套戲實在係必睇之作。因為佢係原本故事嘅外傳,好似一班老朋友廿幾年冇見,睇返佢哋近況噉,好親切,仲有啲感動添。 評價:★★★★1/2 #非打手 圖:鄧月平 Larine

Read More »

新年快樂!

近年有個風氣,就係過年見面,要諗定一大堆四字詞,拋吓書包。 過年嘅祝賀說話好多:恭喜發財,生意興隆,豬籠入水,五福臨門,橫財就手,盆滿缽滿。你要數多幾多十個幾多百個,都唔成問題。不過遇着讀書人,尤其係受過華夏文化薰陶,中文特別叻嘅朋友,就要小心嘞:萬一講錯一句「新年快樂」,你喺對方心目中就難免倒扣二百分。事關祝賀嘅說話咁多,講「新年快樂」太表面、太膚淺,咁啱新年對New Year,快樂對Happy,自然唔係歐化中文,就係劣質語文,污染中文土壤,有辱華夏文明。彷彿你講「新年」就係冇文化,講「快樂」就係冇學識。 我唔鍾意新年,但係好在意自己快唔快樂,所以想喺度為「快樂」兩個字講返句公道說話。 「新年快樂」呢句係咪歐化?梗係歐化啦!錯嘅唔係文字,千錯萬錯係思想歐化。華夏文化一直都冇人真心想對方開心快樂:十句祝賀,七句講錢,兩句講生仔。睇漢詩有幾多首講「喜樂常在」「歡恩美滿」?開心從來都唔係華夏嘅中心價值。大家只係好似打機玩育成、玩大富翁一樣,想多啲人搵錢生仔,帶挈吓自己而已。時代變咗,我哋關心嘅嘢都變咗。我哋唔再想發橫財,唔想自己不勞而獲,唔想迫人生仔;我哋要返去第一步:過返開心少少嘅人生先再諗。 唔知係咪英文人冇文化,所以講「Happy New Year」唔會俾人批鬥;之但係日本韓國有華夏遺風,人哋都係「あけましておめでとうございます」「새해 복 만이 받으세요」,都係一句固定句式。相比英日韓嘅簡約清新,連珠爆發一堆四字祝賀語,非但冇美感,仲有啲土豪,有啲庸俗添。有時諗,如果要舞文弄墨,講祝賀說話不如每家寫篇四六駢文吖?作首律詩吖?度返副春聯吖?開場白十句八句四字格,只不過係門面;入到門口,派完利是,仲可以言之有物,唔係流於盤問說教嘅,先至再講文化啦。 我嘅希望好平實,好謙卑:我淨係想我身邊嘅人幸福快樂。真心話要直接講,你話我冇文化都好,祝咁多位「新年快樂」。

Read More »

我師傅係香港奧巴馬

奧巴馬一如以往喺佢圓形嘅寫字樓度處理佢啲文件。以黑人嚟講,佢嘅皮膚白中帶黃,算係罕見。圓房中間有兩排酸枝梳化,靠窗邊有一張啡色四方摺枱。摺枱上面有一棟書,通通係藍色書脊嘅線裝書,一棟用標楷體印刷嘅中文書函,仲有文房四寶。枱邊係一部崩咗角,俾人掟爛過嘅蘋果電腦。以一國之首嚟講,呢度嘅擺設顯得有啲簡約,簡約得嚟又好夠用。 佢每一日嘅生活都好單調,工作只得三樣:睇書,簽文件,寫字。聖經入面上帝用話語去創造世界。人間嘅世界,一切同樣係靠話語去推動。奧巴馬深知窮兵贖武無可能解決問題,所以佢習慣用文字去做佢想做嘅嘢。 「吖,總統上任之後,一定要發展新科技嘅。」 呢個係奧巴馬今日悟到嘅道理。不過寫實在係太慢,於是佢拎起聽筒,召喚咗Steve入去佢嘅圓桌辦公室。 「史刁拔,好耐冇見。」 「奧巴,我同你講咗幾多次我叫Steve,唔係stupid呀!」 「Oppa你叫㗎咩?囡囡叫?嘛。嚟啦,師傅今次有好嘢益你。」 呢個時候奧巴馬放低一部電話,同一隻 3.5″ 磁碟喺阿史面前。 「嗱,呢部嘢驚天地泣鬼神,叫攞你命三叔,外星科技嚟㗎。美國以後食粥食飯就睇你造化。」 Steve呆晒,講「喂唔好玩我啦,呢部咪 iPhone 囉。周街都用緊 smartphone 啦。」 「你拎隻手指出嚟」 跟住奧巴馬捉住Steve右手嘅手指公,將原本水平嘅右手手指公順時針掃咗90度:「由呢度去到呢度,係人類手指公可以操控嘅範圍,又叫神之領域。外星生物一早探知到地球人類嘅特性,先至生產到呢部咁完美嘅機器出嚟。攞去大量生產啦,包保你發達。隻floppy入面有晒設計圖㗎喇。」 Steve冇奧巴馬咁好氣,拎住兩樣嘢行出咗奧巴馬嘅辦公室。臨走佢放低咗幾本書:「老細叫我俾你㗎。」封面分別寫住《李居明雞年通勝》,《李天命的思考藝術》,《Make America Great Again》。 Steve 出咗房終於忍唔住「Mark哥,你唔好咁黐線啦。iPhone都出到七啦,佢仲拎部iPhone第一代以為係新科技。」 「佢食咗藥就正常返㗎喇。你咪由得佢囉。」 奧巴馬繼續喺房入面,用漢語拼音輸入法記低佢對未來嘅預測:「特朗普提出 go local ,會發佈最新科技,大家拭目以待。」冇人知道呢句有幾成真,不過佢以前估中過一次,之後佢講嘅嘢就冇人再質疑過嘞。 門外嘅亞Steve同亞Mark仲記得今日係1月20號,係老師改名嘅日子。今日佢哋拎住一塊新嘅木牌過嚟,上面係好工整嘅毛筆楷書: \ 香 港 特 朗 普 \ 換好門牌之後,佢哋留低咗一條蒸魚、一碗白飯,就離開控制住世界各國嘅「美國總統府」,鎖好門,返去門外嘅香港,留低房入面嘅特朗普,繼續喺房入面用話語控制自己嘅世界。

Read More »

入夜嘅屋企異常安靜,冇人聲、冇風聲、冇電視、冇收音機,淨係得嘀嘀嘚嘚嘅秒針,一輕一重、一輕一重,提醒我時間嘅流動。飲咗大量咖啡嘅我,心跳慢唔落嚟,微弱噉用秒針一又二分一嘅速度幫我打拍子。 掛鐘嘅安靜嘈到我一片空白,嘈到我連心跳聲都聽唔到。我望住Macbook入面熟悉嘅藍白介面,無論射入我眼球嘅光子反映住幾多光暗對比,眼前嘅影像似乎都無法轉換成有用嘅資訊。我確切知道訊號到咗我腦嘅後方,再向外擴散。我感覺唔到邊樣有意義嘅物件。除咗自己嘅存在之外,我似乎咩都感覺唔到。 自己嘅感覺越強烈,就越覺得周圍冇嘢值得講。明明冇嘢好講,但係呢種想表達自己嘅慾望停唔到落嚟。我嘅布洛克同韋尼奇好似未使抖,唔肯陪伴冇辦法再運作嘅前額葉休息。腦入面嘅小人應該好落力咁提我下一分鐘要做咩,但係我好似聽極都聽唔清左腦同右腦傾緊啲乜——所以我都係交俾十隻手指,就好似玩Ouija,玩碟仙一樣,話我知我跟住要做乜。但係手指打出嚟嘅,係一句又一句,我自己都睇唔明嘅句子。 打字嘅聲音,慢慢蓋過安靜嘅嘈吵。我嘅心跳都放慢返去秒針嘅拍子。我睇到枱面慢慢左傾,畫面時光時暗。 睇嚟我應該去瞓。

Read More »