保存資訊

September 16, 2016 · 1996年,我第一次用PowerPoint畫嘢。嗰陣整咗個地鐵路線圖;嗰一年我仲用 CorelDraw 畫咗幅學校秘道圖,啲file我放咗喺 3.5 吋磁碟,後尾又過咗一部份落 100MB Zip drive。當年仲有一個程式,可以畫間格嘅,我畫咗間屋嘅平面圖;仲有一啲文字記錄,係屋企人嘅工作履歷,儲咗喺部快譯通;又有一堆圖表放咗喺一部叫 wa-puro 嘅嘢入面。仲有一堆ICQ同newsgroup嘅對話記錄。 家吓冚唪唥消失晒lu。啲 file 唔見晒,到中六想睇返啲磁碟,已經開唔返,之後部快譯通壞咗,部 Wa-puro 燒咗,原廠又唔再 support,Zip drive 我都唔知點開返喇。 保存資訊真係好緊要。

Read More »

雙言社會

September 13, 2016 · 學術上有人話香港係一個雙言社會,書寫嘅時候唔用粵語,而係用另一隻鄰近語言去書寫,而書寫嘅時候唔係寫古典語,所以算係現代語雙言現象,世上類近嘅只可以同瑞士德語嘅例子比較云云 (Snow, 2004 et seq)。 若然屬實,即係話大家寫嘢嘅時候係抑制住自己嘅粵語思考,轉台用官話思考,再將官話寫出嚟。既然寫嘅係外語,就要依照呢隻外語嘅群眾習慣,因此要遵照純官話區嘅標準都講得通。 然而,呢個講法同現實大相徑庭。香港學生如果唔係接受普教中,學習嘅時候係以母語去讀中文,用詞彙對應規則去揀字,將同通用中文唔同嘅詞彙語法做個轉換,保持用母語思考,透過轉換去寫一隻多咗人睇得明嘅折衷文體。 實際嘅操作,香港嘅情況唔係瑞士式嘅現代語雙言,反而同古典語雙言(即係舊陣時學文言文嘅原理)似得多。事實上香港普遍使用嘅通用中文,更加似係喺文言文之上大量官話語法同新詞。呢個現象同阿拉伯語,新挪威語嘅情況相近。 對於香港嘅中文書寫群體而言,加入咗大量官話元素嘅通用中文,可以話係文言文傳統嘅延伸。通用中文雖則借咗唔少官話,但係應用起上嚟,文字係公家,官話冇光環,話語權在於講任何中文嘅文人。標準好寬鬆,一隻書面語,各種語言自行增減,官話話者、或者中國語委只不過係其中一批用中文嘅人,無權話事。 當然呢類書寫文字唔及直筆寫母語(例如粵文)方便,寫出嚟同母語相距甚遠,但係對唔用粵文嘅人而言,呢種係佢哋嘅主要(甚至係唯一)書寫文字。我哋唔可以無視呢班香港中文使用者呢套書寫習慣,假設用官話語法必然要受官話嘅標準機構制定嘅單一規範。作為文字,通用中文嘅出發點係官話,但係一日寫中文嘅人係用粵語思維,一日官話都唔可能凌駕中文。 不過呢點假設係建基於粵語教中文之上。保持到粵教中,中文就係用粵語寫字嘅其中一種書寫體。粵教中失守,轉用普通話教中文,噉香港就會變成瑞士式雙言現象,文字話語權要拱手相讓。我哋唯有希望喺呢件事發生之前,粵文可以建立到足夠支持,去令到粵語嘅生命力延續落去。

Read More »

我係一個毒男,今日第一次搭巴士有人搭訕

September 9, 2016 · http://goo.gl/wJjzCe 今朝返早,我搭咗架冇乜人嘅巴士。有一個人企喺我隔離好耐,我望一望佢,個樣有啲陽光氣息,冇化妝,又冇着裙,着住件鬆身嘅T-shirt,貼身長褲,短頭髮,冇紥起嘅,打扮清爽。 初時我都冇理佢,但係喺我就快落車嘅時候,佢忽然同我講:「早晨。你知唔知道⋯⋯   2016年9月6日,奧林比安正式退役喎。」 呢種打招呼嘅方式實在殺我一個措手不及。我發晒吽逗,問佢,「邊個嚟㗎?」 「奧林比安,AV531,9月6日,完成89B,就正式退役。」 喺佢眼中我睇得出一絲傷感。我諗咗一陣,奧林比安係邊個,Okubayashi Hian? 可能係我唔識嘅女優啦。89B 我確實係唔會有興趣。但係一個陌生人望住我,講啲咁嘅嘢,的確係有啲尷尬。 雖然我都未聽得明,之後我就落咗車喇。回頭一望,見到佢着件衫上面,寫住乜乜 Mental Health。我諗或者太過鍾意一樣嘢,都可能係病嚟嘅。不過我鍾意讀書、模型、音樂、漫畫,有邊一樣唔係噉?愛一樣嘢愛得好深嘅話,其他人未必聽得明,甚至會以為你有病。 雖然佢嘅奧林比安退咗役,不過我都希望佢唔會傷心太耐啦。 #冇攞contact #唔知會唔會share到佢本人見到呢

Read More »

香港要點樣先至會強大?

September 8, 2016 ·   有人問我,香港百廢待興,點樣先可以令香港強大。   香港嘅問題,在於崇優。崇優即係乜都追求追好。香港得七百萬人,土地就係得一千鬆啲平方公里,要搵最好嘅,唯有向外求。   於是乎,食要食至好嘅,單調嘅粵菜、茶餐廳滿足唔到大家,本地生產嘅,蠔豉、蝦醬、鹹魚更加唔合大家要求。所以要追求其他嘢:韓國炸雞,日本壽司、中國米線、台灣三文治;聽歌又要搵最正嘅,唱功要媲美咩歌唱家呀、Mariah Carey呀,人數要似 AKB48咁多,啲腳要夠少女時代咁長;甚至講到囡囡,都要最後生、要最靚女、身材最好嘅,所以電腦面前就睇㗎妹,落旺角就搵東歐少女,或者叫雞都貪平去鄰國叫。   你會話,崇優唔好咩?有要求唔好咩?問題當你用「最好」去做標準,你嘅選擇就意味住要放棄一啲差少少嘅本地嘢。你每次買一樣「非本地」嘅好嘢,就係放少咗錢俾本地嘅產業發展。如果本地嘅產業未係最好,你亦都唔使指望其他人會用,所以追求最好,就係扼殺次好嘅決定。   噉點解要你屈就,去用一啲可能係差少少嘅本地嘢呢?嗱,其實本地嘢未必真係差啲:因為好多嘢冇客觀標準㗎,你話格仔餅好食啲定雞蛋仔好食啲?每個人都有唔同答案。就算一啲有得客觀比較嘅嘢,差少少其實都冇乜所謂。例如你請一個打字員,一個本地員工一分鐘打到100字,而外地員工就一分鐘打到110字。你係咪代表後者好過前者呢?唔計一切其他因素,其實嗰少少速度真係唔緊要㗎。如果放棄少少「優」,係可以令到本地人,本土嘅產業有所發展,其實呢啲表面上嘅蝕底,其實隨時有賺㗎喎。   尤其係去到文化呢啲,要靠積累返嚟,而唔係石頭爆出嚟嘅嘢。你睇多啲本地作家嘅作品、粵文寫嘅嘢,就算未必夠紅樓夢咁好睇,未必有莎士比亞咁劃時代,但係多人睇就自然多人去開發,多人開發就會越嚟越好。又例如你話香港啲歌唔夠好聽咩?啲囡囡唔夠靚咩?啲妹妹唔夠可愛咩?只要夠多人聽,有足夠嘅fans base,啲唱歌叻跳舞勁外表萌嘅細路女,自然就會入娛樂圈㗎啦。因為係本土嘢,第時你哋唔使學日文學得咁辛苦,都有得睇 idol ,真係物超所值呀。   我用再簡單嘅方法去說明,就係唔好嘗試搵「最好嘅嘢」,試吓搵啲最地道,最本土嘅嘢。開頭你會以為自己係含淚,但係慢慢你就會發現,其實香港本身啲嘢都唔差,只不過係以前你未察覺啫。就算而家差,只要大家一齊支持,自自然就會進步㗎喇。

Read More »

小麗老母當選係咪代表香港人冇資格擁有民主?

September 5, 2016 · 無論大小選舉,每當有啲唔啱心水嘅人當選,總會有朋友喺度喊苦喊忽,話咩香港人唔配有民主,又港豬又盛,認為香港係因為民智未開所以先至有今日嘅政治局面。其實呢套「民主只屬於民智已開民族」理論,正正就係唔認識民主嘅表現。 要計民智,香港都算係一個識字率頗高嘅地方,大家IQ又冠絕全球。我諗要搵一個全職師奶都會識得炒股,識得格價嘅地方,真係唔係咁易。數民智未開嘅地方,冇幾耐之前,有一個叫南蘇丹嘅國家行咗個選舉。佢哋嘅文盲率係近百。差唔多全部人都唔識字。但係佢哋都可以有民主㗎。照噉計香港係咪好好多呢?大家係咪覺得要GPA過3先至可以投票?噉不如人民民主專政算啦。 千祈唔好覺得選民單純係俾人呃先會投佢哋嗰票。你屌完啲選民唔代表佢哋會支持你。正如你日後有任何政治立場,想做啲乜,你喺 Facebook 或者現實點鬧都唔會有人理你。香港人係真係好聰明。聰明到唔會諗太長遠嘅嘢,唔會諗咩下一代嘅事。一個八十歲嘅老人家,你覺得佢會為自己仔女着想,定係自己啲孫塞着想?關心係由近至遠,有錢嘅人唔會得閒理窮人,老人家都唔得閒理啲未出世嘅下一代。 就算過多幾多年,無論點樣發展,香港人嘅投票意向一定係自己利益行先,跟住先至到下一代、成個香港嘅利益。但係噉唔代表香港人唔配有民主,唔配有公平嘅選舉制度。劉小麗當選即係大家覺得,比起未來,都係有一兩個鬧人叻嘅議員更加有用。大家唔要改變呀,大家淨係要 soundbite 咋。 不過最緊要一點,係喺大家利益有衝突嘅情況底下,點樣可以爭取最多嘅嘢,點樣凝聚多啲同自己理念一致嘅人,去做啲可以改變現狀嘅事。試吓唔好屌港豬或者屌九西居民。你哋可以做多好多嘢。 >>> 加多句,大家有兩件事可以做:① 生仔 ② 留喺香港 大家諗諗佢。

Read More »