關於Peppa Pig 同 小丸子兩點疑問

August 25, 2016 · 今日,有朋友問我下面兩個問題: ① how come peppa pig only have yea yea ma ma and no gong gong por por ② 小丸子 only have yea yea ma ma and no gong gong por por (點解兒童動畫《Peppa Pig》同《小丸子》都得爺爺嫲嫲,冇公公婆婆嘅?) 首先,Peppa 係豬,你唔可以用人類嘅道德觀去理解。其實豬爺爺,就係豬公公;豬嫲嫲,就係豬婆婆。例如喺 Season 3 Episode 19 (#124 Granny pig’s chickens) 入面,豬嫲嫲帶咗 Peppa 同 George 去睇豬媽媽細個間房。好明顯佢哋係同時睇住豬爸爸豬媽媽長大嘅。可以理解成,佢哋兩個都係豬爺爺佢哋嘅仔女,兩兄妹,大個咗就結婚,生咗 Peppa / […]

Read More »

我唔信!講普通話嗰啲一定唔係香港人!

August 22, 2016 · (前言:聽朋友林非講,話見到土生土長嘅香港細路用支話(即係普通話)溝通,覺得不寒而慄;跟住有人就話佢哋係新移民、雙非、黑工子女,講到好似覺得真香港人冇事,唔使擔心噉。我覺得我要講吓自己對呢個現象嘅睇法同對策) 香港一向都多新移民,主權移交之後可能再多咗。但係以往嘅人喺學校、喺社區都會用粵語溝通,至少喺兩個人講唔同家鄉話嗰陣,粵語會係最正常嘅交際語。家吓呢,係成日見到兩個粵語人,用普通話溝通。就算次次你都話佢哋係新移民,一樣令人憂慮。何況而家已經去到土生土長香港人都噉樣做。 講到語言,一般人就冇乜腰骨,亦都難怪。「語言用嚟溝通」呢個概念好根深蒂固。否則我哋粵語邊度嚟咁多借詞先?大家關心內容,多過關心你用乜嘢話,所以轉台,一般人根本就唔會察覺,更莫講話會覺得唔妥嘞。 當然你可以話有容乃大,我哋應該接受香港係文化多元乜乜物物,所以多幾隻語言冇所謂。我知道有啲人好buy呢套:覺得只要保持到香港嘅特色,入面啲餡應該換乜都得。呢種心態好牙煙嘅。你叫全部香港人轉講港式英文溝崔世安式普通話,創造一種新混合語,我肯定會繼續保持到個「香港標籤」,但係我哋真係淨係要呢個標籤就夠?冇咗啲內涵都得?外來文化入侵、同化,其實從來都係咁做。迫你學,等你對呢種外來嘢習以為常,但係永遠將佢講成係高等啲嘅,跟住社會上個個仆到去學「高等文化」,之後慢慢溝淡晒原有嘅嘢,淪為外來文化嘅在地版。在地化咗嘅外來文化,更加難摵甩,更加易入口,你睇 Singlish 、台灣國語幾咁強勢? 仲有人會話,只要我講普通話保留到強烈口音,就可以令對方就範,就保護到自己嘅語言。你可以睇返上面。變種而在地外來文化係更加容易消滅自己嘅,呢啲破滅之道唔好行呀。 (離晒題添。) 而家係一種兩難嚟嘅。 如果大家純粹想要一個標籤,噉入面嘅嘢唔重要,細路出街講普通話、英文都冇問題。但係香港文化嘅定義就會過度多元,變咗一個無限漂移嘅龍門;如果你用日常講「廣東話」做指標,噉你就一定要排除好多人,要將好多香港土生土長嘅人當係文化上嘅外人、非香港人。 單單當廣東話係Shibboleth —— 識講就係香港人,唔講就係外人,係完全搞錯咗個問題。因為好多香港人係明明屋企講廣東話,出街都係要用普通話。識講而唔講,一樣係留唔住。 我哋要填返上面個 gap。唔好呃自己香港係咩多元社會,文化上今日嘅香港係以粵語為主軸。同時要承認,有一班香港人,佢哋嘅生活係偏離咗香港嘅主流,融入咗中國。 想保持到香港現存嘅語言文化,至少要鞏固一大班同時遊走於粵語文化同中國大陸點圈嘅人,而對粵語/廣東話嘅責任感係其中一點。 作為起步,我哋至少應該推廣以下幾點: 1)粵語族群,有責任認識並推廣粵語; 2)粵語母語者之間,溝通上應優先使用粵語; 3)盡量用粵文書寫; 4)避免接觸普通話資訊,以免粵語受單一語言影響; 5)生兒育女,同仔女溝通淨係用粵語; 6)鼓勵唔識粵語嘅人學習粵語。 上面六點,聽落好溫和?對好多人而言已經係終極法西斯。 不過點都好,希望大家試吓做。 圖:鴕鳥

Read More »

食花生真實成本

August 19, 2016 · 有政黨出事,揼春之外,我仲好唔爭氣噉食咗一陣花生,聽咗陣神駒。之後點樣我都唔知,不過補鑊又輪唔到我哋做。你分析得嚟,話唔定一兩個鐘之後有關人物又有一着神來之筆/引發下場公關災難都未定。 大家覺得應該做啲乜?返返去正常生活先啦。 吖,講多句。 做錯事除咗柒之外,其實仲嘥咗幾千人時間。呢幾千人如果唔係你柒咗呢嘢,喺處食花生或者悲春秋,可能會多兩個鐘時間做其他嘢。我當你只不過係嘥咗 3000人 [1] 嘅 兩粒鐘,每粒鐘我假設只係值最低工資 $32.5,你座底浪費咗香港人 $195000 喇。 [1] 淨係神駒個台都 兩千幾人聽啦,寫三千我算好厚道。

Read More »

今日講寫字:「緊係」定「梗係」?

August 15, 2016 · 我知道好多朋友會覺得「緊」同「梗」係同音。不過好多老一輩見到大家寫做、講做「今次死緊」「緊係」,會好唔慣。 我本身都好開明,認同呢啲係自然轉變。不過若果要同老一輩接觸,佢哋未必個個接受到新式嘅發音。所以上選舉論壇,有時要顧吓老一輩嘅聽眾,最好讀返前後鼻音分明(即係「緊梗」「痕恆」「八百」「扎窄」要區分)嘅老派粵語;寫文宣,最好都避免用老一輩聽起嚟唔同音嘅字去假借。

Read More »

如果愛就係選擇

August 14, 2016 · 如果 #愛就係選擇,你揀嘅每樣嘢都應該反映住你所愛,人生應該充滿愛先至係。點解人世永遠充滿恨呢? 因為【愛】係理想入面你想揀嘅嘢,但係現實上我哋受物理限制,你冇可能每次都準確攞到、㨂得切正確答案。所以【選擇】唔係愛,而係經過讀取錯誤、延遲或者錯手等等實際問題過濾之後嘅投射。 愛同愛嘅投射之間時時會出現偏差。如果你唔老實,唔夠膽面對自己嘅諗法,好易就會違心而行,不斷揀啲唔愛嘅嘢。 所以[愛就係選擇]並唔係真理,而係目標,係要時時提住自己,日日誦念嘅戒條。呢個目標唔易實踐,唔少人成世人都做唔到。

Read More »

點樣可以幫到香港?

August 6, 2016 · #9up #不過會落手做嘢 香港最多嘅就係人材。但係好多人根本唔做啲乜嘢先至幫到手。 以往大家就諗,喂,有班有心人做?嘛,捐嚿錢俾佢哋咪得囉。 但係噉樣唔實際㗎! 實際上好多人有好犀利嘅idea,又要好多有心嘅人去實行。亦都有好多好叻嘅人,唔知有咩可以幫手。其實有冇辦法可以建立一個平台,想搞咩project嘅人就講低自己 ① 想做啲乜 ② 有乜 deliverables ③ 要咩人材 ④ 要幾耐 然後用呢個平台等啲一時諗唔到有咩做嘅人,可以貢獻吓自己嘅時間? 有時唔係錢嘅問題,有啲組織拎住幾百萬善款,但係我都唔知佢哋做咗啲乜。我覺得聚集到一班做到嘢嘅人,先至係最好嘅 solution。 你哋有冇一個鐘時間?我肯定要擳,一個星期點都擳到出嚟。你哋會點樣用一個星期嘅一個鐘頭去幫香港?我都幾肯定如果我增加到「得閒嘅人」同「要人嘅project」嘅 match,一定有得做。

Read More »

豬扒腸仔麵

August 4, 2016 · 圍城附近得兩間餐廳。一間喺城外,一間喺城內。城外嘅餐廳係大財團控制,價位高,味道只係一般。難得城內有舖頭開張,點都要試一試。 呢間餐廳叫自己做茶室,不過其實係開放式設計嚟。餐廳對上一手行高級路線,所以枱枱櫈櫈都有格調:客座係玻璃圓枱配以皮梳化;伙計企喺吧枱後,水吧係流線型設計。不過高級嘅餐廳做唔住,大家或者只係要啲平民享受,茶記開喺呢度有啲違和,不過更加啱我心水。 坐低之後一個後生女驚驚青青噉放低一個單調嘅menu,白底紅字,用標楷體寫住幾十個餐。有麥皮、有通粉、有三文治、有公仔麵。早餐嗰格,有一個餐嘅字體大過其他少少,叫清仔套餐。豬扒雞扒任擇一款,再加一餸配丁麵,卅五蚊送熱飲。我諗都唔諗就嗌咗個豬扒腸仔麵。 唔到五分鐘,伙記捧住個白色底,藍色花紋嘅陶瓷碗過嚟。一塊豬扒,齊揖揖噉剪咗做七等份,晾喺麵面;一條腸仔喺豬扒隔籬。你知唔知平時啲腸仔,其實係雞肉腸嚟㗎?英文好似叫chicken frank。所以腸仔同豬扒一齊食,都唔會咁哘,但係配雞扒就略嫌單調。初時我只係期望啲麵唔好太腍,啲豬扒有煮熟,條腸仔冇發脹。或者係上次喺城外餐廳食咗塊生雞扒嘅陰影,我對呢頭啲餐廳已經冇咩期望喇。 點知一咬一啖豬扒。不得了。塊豬扒厚薄均勻,大概三毫米厚;唔係浸熟,而係輕輕煎過。食油又唔多,啱啱煎出香口,又有一種炭燒嘅苦澀口感。條腸仔都係煎腸,浸咗啲湯都仲有煎腸嘅香味。麵底係出前一丁,本身有蠟質嘅麵,一般唔係煮唔熟硬掘掘就係腍過頭。呢個麵居然做到彈牙效果:麵嘅外層完全熟透,但係麵芯仲係咁煙韌。 只係最簡單嘅廉價食材,調理適中,喺我眼中已經近乎完美。我又使咩食咩黑毛豬、拉麵、德國腸? 其實開心真係可以好簡單。 (相:後補,今次食咗豬扒餐肉。水準依舊。)

Read More »

學極都唔識・日語篇・草稿

August 2, 2016 · 對香港人而言,英文同普通話都係主流嘢。講得好冇人讚你,講得差會俾人笑,其實似係生存技能多啲。對好多人而言,尤其係毒撚,日文應該係第一隻為興趣而學,又要由零學起嘅語言。首先我要不厭其煩噉講多幾次,語言冇絕對嘅深淺,一切都視乎你本身嘅背景。首先我循語言特性、使用狀況、文化背景呢幾方面分析。 口水乾都要講,好多人,尤其係學識咗嘅人,會同你講「唏,學語言咪不外乎聽講讀寫?」「你俾心機學就會識」「搵個男朋友女朋友咪得囉」呢類「專業意見」,大家其實可以無視嘅。 (我知道大家懶,唔鍾意技術嘢可以跳過分析) 【語言特性】 語系:日本-琉球語系(Japonic Familiy) 同源嘅只係得十幾隻琉球群島嘅語言,仲有消失咗嘅百濟話。吖,你可能睇過好多書話日本同韓國、滿州、蒙古、突厥同源,叫做「阿爾泰語系」,不過呢個睇法受到好多歷史語言學家嘅質疑。相同語系嘅語言,語彙會相近,有啲語法特性都會接近,所以粵語人學客家話、上海話都唔算好難。學一個新語系嘅語言好多時意味住你會見到啲古怪嘅難題。 詞彙:豐富本土語彙,有大量擬聲擬態副詞 話明係獨立語系,當然會有自己一套詞彙。不過由於同中原有頻繁接觸,所以吸收咗大量漢語詞。 語序:SOV(主語‧賓語‧動詞),修飾語前置 同粵語、英文都唔同,日文嘅動詞係放最後嘅。 發音:極簡單。 音節構造簡單,有清濁音之分,標準話係「音高‧重音系統」,可以當佢係「用詞語做單位,較為簡單嘅聲調系統」。有粵語重疊部份、亦有同英語重疊部份。不過語調並冇粵語嘅聲調咁抑揚頓挫,粵語人要啲時間適應。如果屋企講上海話、福建話,應該會有少少幫助。 書寫系統:漢字、假名並用。間中會有少量拉丁字母。 漢字喺二戰後簡化過一次,好多意思相近、讀音近似嘅漢字合併咗,字形上都有啲改革。不過基本上同香港用嘅漢字相通。假名係兩套由漢字簡化而成,單純用嚟記音嘅系統。兩套記音系統喺現代有分工:平假名用嚟做一般書寫,片假名用嚟寫外來語、動物名。好多單詞會用漢字寫,有啲單詞(主要係動詞、形容詞)就會將前面冇語法變化嘅部份用漢字寫。講咁多只係想話俾大家聽,如果唔想做文盲,係冇得揀嘅:一定要識晒漢字同兩套假名。 【語言狀況】 母語話者人數:1億3千萬 單語話者人數:你當係1億以上啦 內部分歧:好細,隨便抽兩個講日文嘅人,佢哋溝通上唔會有咩問題 文盲率:0% (係呀!零呀!人哋由明治時代已經做到全國就學喇。) 仇外情感:弱,非常願意同外國人做生意、溝通 其他共通語:冇(即係佢哋之間淨係會講日文) 官方地位:有 文言書寫傳統:二戰後已經廢除 言文一致度:高。正式文件嘅文體同口語相當接近,只係詞彙上嘅區別 學習詞彙多寡:由於日語係一隻吸收咗大量外語嘅語言,所以詞彙、表達方式都好豐富 標準語優先取向:極強  口音包容:弱--高低音錯咗唔緊要,長短、頓挫、清濁一定要啱 【文化背景】 文化輸入流向:文化輸出國 資源量:極多 電影電視動畫流行曲、漫畫小說,由初級至上級嘅教材,可以話係唔計英文,學習資源最多嘅語言。 考試檢定:JLPT 日本語能力檢定 等 (仲有好多,請自行 Google) 【?清目標】 睇完上面嘅資料你應該會覺得學日文唔太難,香港人(尤其係兼擅粵英,或者有閩語吳語背景嘅人)有好大優勢。記住,一步一步嚟。 一隻語言由零開始,要學到睇日劇冇字幕睇得明,要學到可以傾偈,要好長時間。不過有啲嘢並唔係想像中咁難。用 CEFR 嘅分類法,其實大家嘅水平去到 B2 頭(即係個底打得好好嘅中階學習者)就已經睇得掂日劇,可以用日文去 shopping 同傾閒偈㗎喇。 【解惑篇】 (1) 假名使唔使學? 對完全初學者而言,一下子要記住九十幾個字符,聽落真係好多。雖則香港人本身有漢字底 […]

Read More »

魅力論

August 2, 2016 · 要說服大眾,唔係要由理論入手。而係要自己友個個都有咁上下魅力。魅力唔係講嘢叻就得。你理論萬能,寫文曉飛都好,企到出嚟原來係殘師奶,係肚腩大叔嘅話。唔好意思,你註定係會冇人理。 記住: 男嘅要整潔要有型。 女嘅要識打扮要靚女。 唔係我 #物化男性 #物化女性 ,而係人類本性如此。 你諗吓如果陳雲係廿零歲嘅肌肉型男,會幾咁震撼? 總之大家一齊改善外表、操fit自己啦。 理論唔入屋唔緊要,外表入屋咪夠。唔通你改變個理論去遷就選民咩? #反肚腩太聯盟 #以貌取人協會 #韓國近了你們應當悔改

Read More »