粵語詞

July 24, 2016 · 潘科元:「華語一字一音多義,但是台語較幼路、無仝意思有分別講無仝音,而且愛寫無仝漢字个單字」 呢點我想講吓粵語嘅情況。同北方話比,粵語有好多嘢分得好開。點解會噉呢,係因為我哋維持粵語詞(大量嘅漢緣詞、少量百越詞),吸收咗一堆官話中文、英文、甚至和製漢語、福建話、潮汕話、客家話、上海話、其他片嘅粵語。 所以我哋可以講「攞」「拎」「?」「搦」「hold」「取」;可以講「熱」「㷫」「焫」「燙」「滾」;可以講「污糟」「邋遢」「哪喳」;可以講「可以」「得」「到」。吸收咗新詞之後,每個詞嘅意思會慢慢分工,令到我哋嘅語言越嚟越豐富。 只要我哋唔好揼咗粵語本身啲詞去,其實吸收少量外來詞,係健康現象嚟㗎。

Read More »

螞螂艇

July 18, 2016 · 話說我加緊「螞螂艇」個entry。 網上見到有人引《廣州方言詞典》(改咗做粵文) //螞螂艇——一種尖頭小艇,一人喺艇尾搖穞,有船篷,陳設講究。要僱用須包艇,價較貴。可坐四五人,艇上可設酒宴 ‖據講此種艇划行好快,如蜻蜓點水,故名「螞螂」。音借滿語,即蜻蜓。而家北京口語仍叫蜻蜓做「螞螂」// 任何時候見到關於滿語嘅嘢,我都唔會信㗎。一個二個左抄右抄,你俾我見到個滿語詞,我喺滿和、滿漢詞典見到滿文或者轉寫,先至作準。於是我真係去查啦。 同「螞螂」差唔多音嘅,得malangû 呢個詞,解芝蔴。 滿語嘅蜻蜒係 ulme hûlhatu,認真九唔搭八。 反而泰文嘅「蟲」,係 แมลง (ma laaeng),連埋聲調都幾乎同音。 (不過唔一定係蜻蜒嚟㗎⋯⋯ 曱甴係「螞?烚」) 真係信一成都死。

Read More »

啲廢青連岳飛係邊個都唔知

July 3, 2016 ·   啱啱睇到段片,係大家恥笑 #吳若希 唔知岳飛係邊個,以為岳飛塊面好紅,又同人結義,背脊刺咗「反清復明」。唔好講真假住,大家覺得佢唔知岳飛係邊個,有咩問題?     我試吓拋兩個理由出嚟: 一) 岳飛係歷史名將,一定要識 二) 細個課文有《岳飛之少年時代》,學過嘅嘢應該記得   我哋不如做個實驗。   【第一部份】 我抽一堆中國歷史名將,大家講唔講得出佢哋係咩年代嘅人,有咩事蹟? ① 王翦 ② 韓信 ③ 衛青 ④ 郭子儀 ⑤ 袁崇煥   【第二部份】 我想講幾樣初中應該學過嘅嘢,又考考大家記唔記得? ① 證明兩個三角形全等嘅條件 ② 第一次世界大戰嘅遠因近因 ③ 官渡之戰嘅經過 ④ 動物細胞同植物細胞嘅分別 ⑤ 藍礬(硫酸銅,Copper (II) sulphate) 嘅製作方法   我唔係為冇常識辯解,而係大家對「常識」嘅理解可以有好大分歧。有啲乜嘢一定要識,取決於好多因素。有啲係學校學,有啲係屋企人講,更加多係睇流行文化:小說、流行曲、大戲、電影、電腦遊戲呢啲聽返嚟。電視做《武媚娘》嗰期,個個都知道唐代有個皇帝叫李顯,聽過上官婉兒;興打《三國志》嗰期個個都識一百幾十個三國武將;鄭秀文出咗首歌,大家就會聽過「薩拉熱窩」(不過未必知道波斯尼亞係乜,遑論會聽過咩黑塞哥維那)。大家記得「全等三角形」嘅條件,可能都係因為嗰首《Side Angle Side》咋!   一個家庭主婦,或者會話:「你劏條魚都唔識﹐好冇常識囉!」 一個電腦人,或者會話:「你連 windows 都唔識裝,好冇常識囉!」 […]

Read More »

超簡單聚會遊戲介紹:國城食職

July 3, 2016 · 前排喺某個朋友聚會玩咗一個遊戲,叫做【國城食職】。呢個遊戲,每人有一張 A4 紙、一枝筆,就玩得。下面係引進者 Laurent Chan 嘅玩法。 玩法非常簡單,首先一個人要求其抽個字母(擲骰又好,乜都好,我哋嘅做法係叫 某甲 由 A 開始數英文字母, 某乙嗌開始,甲就開始數,乙嗌停,甲就講個字母出嚟)。跟住大家就要諗呢個字母開頭嘅 「國家」「城市」「食物」「職業」。 e.g. 假如個字母係 S,你嘅答案可以係 「Somalia 索馬里」「Seoul 首爾」「Sugar 糖」「Shepard 牧羊人」噉。第一個人答完,倒數 20 秒後所有人停筆。 之後,大家輪流報答案。如果係獨一無異嘅答案,得10分,有重覆,得5分,唔啱嘅答案,冇分。每 round 最多 40 分。 你用英文名玩又得,用粵拼又得。變化好大。你鍾意將「職業」變做「街名」「歌星名」都得。 大家試下玩,跟住講吓感想。

Read More »