「批個頭俾你當櫈坐」

June 24, 2016 · 「批個頭俾你當櫈坐」 呢類俚語變化極大,唔講「批」講「切」又得,掹走「俾你」又得,掹走「當櫈」又得,加「落嚟」又得⋯⋯ 一般詞典就收錄幾個常用變化,少數就會乜都唔理拆開晒佢(e.g. urban dictionary)。但係如果有個可以寫做簡單啲嘅格式,好似噉樣: [切批]個頭(落?嚟)?[俾畀]你(當[凳櫈])?坐 應該會幾開心。

Read More »

十八歲嗰陣,我俾仔仔中出咗⋯⋯

June 20, 2016 · 【十八歲嗰陣,我俾仔仔中出咗⋯⋯】 #出處不明 #唔係我 #自行配圖 之前有篇文講「讀大學,不如十八歲就中出」,一定有好多人以為係抽水,但係其實呢個係認真建議嚟。早喺呢篇文出現之前,我就已經做咗! 大家成日講 gap year,覺得要大學前環遊世界體驗吓,但係香港人咁矜貴,體驗得啲乜?咪又係美國加拿大日本玩幾個月?所以我決定唔 gap year。Gap year 太膚淺!我要生BB,我要 gap child!我要 gap仔 gap 女! 讀大學之前,生個細路出嚟,先至叫做體驗人生呀!你會多咗好多責任,面對各方壓力,要控制情緒,要練習分配時間,要管理一堆家頭細務。就算係仔仔,都可以趁後生,創吓業,搵啲唔同工種試吓,世界咁大,大把機會嘅。 講返我嘅故仔。三年幾之前,我同仔仔決定咗,考完 DSE 之後就要實行我哋嘅組織家庭計劃。我同佢都讀傳統名校,成績一向都幾好,但係實在唔想好似啲人咁平平淡淡,入大學,搵工,做十年儲錢。就算做到麥明詩咁又點?一啲都唔型囉。所以我就有呢個計劃:香港人平均結婚年齡係三十歲,生仔我當係三十二歲啦。我哋將成件事提前十五年。所以考DSE之前,我哋就唔再用condom,希望可以就啱二三月生BB。不過個DSE,我哋一樣要盡力考,我哋只不過係將讀書延遲幾年。 一齊按原定計劃進行,兩年前過年之後,佢就出咗世。過咗一兩個月,換片餵奶已經熟晒手。跟住我就喺屋企湊仔,老公就出去搵工。原來中六畢業都有好多可以做嘅嘢。工種就唔講,不過唔會差得過大學畢業生。我就喺屋企接啲兼職做吓,都叫做有啲收入。其實我哋成績唔差,要讀 law 讀 醫都唔成問題。不過為咗呢個計劃,遲啲再算啦。佢同我都啱啱廿一歲,好多同學都大學畢業喇,不過我哋仲未諗住讀返書住。 我哋之後諗住湊到BB入小學,我哋再一齊入返U。到時我哋先至二十四歲左右。係就係遲咗六、七年入學,但係我自覺人生歷練已經超越一般同齡嘅人。起碼叫做有個家庭,大家都唔使掛住溝仔溝女。而家我哋有退稅、有用學券(斷估我唔會蠢到學中產去報啲一萬蚊個月嘅幼稚園啩)。不過就冇申請公屋。收入都夠,廢事同其他人爭啦。 計返條數,廿六歲前,我哋仲有地鐵學生優惠㗎。一家大細都用同一個價錢搭地鐵,真係爽呀。 我哋到時大學畢業出嚟,廿八歲。不過已經有好幾年工作經驗,又有個終身伴侶,BB 到時差唔多有個十歲,可以同自己交流嘅仔。我估到時好多中學同學,隨時仲係魔法師咋。 再過十年,我哋仲係三字頭,如果阿仔用返同一條方程式,我可能已經準備抱孫,佢要搬出去住。我哋兩公婆又變返二人世界。啲同齡朋友呢?啱啱學緊換片,餵奶。或者仲係王老五。 所以我覺得我先至係人生贏家囉! 祝大家父親節快樂。

Read More »

講起垃圾分類⋯⋯

June 14, 2016 · 講起垃圾分類⋯⋯ 其實我贊成政府搵人逐包垃圾拆開佢做分類㗎。環保人士覺得好多資源冇妥善回收,任何一刀切嘅垃圾徵費你又話唔公平,咁好簡單啦,你請一大堆人管理垃圾就得。每家每戶嘅垃圾都要妥善分類,廚餘、罐頭、膠樽、塑膠、大型垃圾,按量計費。違規嘅就按戶罰款。 試諗吓,當每一袋垃圾都要做一次人手篩選,中間要幾多人手?我諗每人每日可以處理100戶嘅垃圾,即係全港隨時可以請到 30000個人!你諗下可以創造幾多就業機會俾低技術人士?唔好以為真係現兜兜要 1年出 幾億喎。所有攞緊綜緩嘅人,即時有工開,即係大部份人唔使攞綜緩。分類做得好又可以減輕堆填區負擔喎! 呢件事一舉多得㗎。香港夠唔夠膽做?

Read More »

拼音系統係一套協定

June 13, 2016 · 拼音系統係一套協定,好似串字法、程式代碼噉。決定咗一個寫法,就唔可以立亂改㗎。你唔可以話覺得 太長就寫做 ;唔可以話 randomize() 唔啱睇就改佢做 randomise()。串英文你都唔會話 phone 太煩寫做 fone,寫漢語拼音你都唔會話輕聲好緊要,夾硬寫做第五聲,唔會話「就」「舊」分唔出就作個新拼法出嚟。嚴格嘅協定,一係跟,一係唔跟,一改咗,就係另一個系統:會唔兼容,會出問題。 整另一個系統出嚟,會 #xkcd927 。唔係絕對唔得,但係至緊要講清楚。千祈唔好覺得可以就住自己喜好改一兩樣嘢。粵拼有咁多系統,早期冇乜共識都算,近年嘅問題其實係衰你改一樣我改一樣。結果學會粵拼有一堆變種,千島式又四個變種,教院式、劉錫祥式、耶魯式都係。本身有五套已經夠多,加埋啲變種亂到九彩。對教師當然有着數,學生唔易轉換,於是好難轉老師換教材。但係噉就犧牲咗成個語言嘅發展。 每一個寫教材嘅人,都責無旁貸。

Read More »

松尾芭蕉

June 11, 2016 · 日本嘅俳句呢種文體,係 5-7-5 句式嘅詩,其中一定要有一個同季節相關嘅表現。用現代角度睇,或者有啲似咩「六字小說」。區區十七音,變化萬千;文體簡單,但係歷久不衰。 廣府冇獨特嘅詩歌體,不過有南音呢種說唱傳統,唔知有冇可能喺詩、詞之上,發展一套新體系出嚟呢? 圖中係兼六園嘅句碑,上面刻住「俳聖」松尾芭蕉喺金澤寫嘅俳句:あかあかと日は難面も秋の風。

Read More »

小心地滑

June 8, 2016 · 喺日本見到「順路」「土足嚴禁」「開放禁止」呢啲告示,一般都唔會考慮其他漢字語言嘅人。如果真係要寫俾外地人睇,自然會用返對方嘅語言。我喺度諗,其實香港嘅告示,一樣可以寫返啲俾香港人睇嘅嘢㗎噃。 當然「非請勿進」「此路不通」呢啲應該保留。 *我唔係主張廣東話一定要寫到北方人唔識睇。語文要自己揸fit,用人哋識唔識睇去思考,真係好戇居。* 【小心地滑】,不如寫做【因住跣親】吖?

Read More »

如果,我係早少少出世嘅香港客家人

June 7, 2016 · 如果,我係早少少出世嘅香港客家人,我一定會好痛恨講廣東話嘅人。 點解我講歪咗一兩隻字就俾人笑? 點解我細個聽返嚟嘅俗語諺語,個個都聽唔明? 點解我讀書要逐個字記字音? 點解我返學唔可以講自己最熟悉、最流暢嘅家鄉話? 因為香港市區廣府人真係好多,如果你屋企係客家人、福佬人,係㗎,你真係會好慘。真係要好俾心機學廣府音,又要記住邊啲講法係自己家鄉話,記住講咗會俾人笑。 但係覺得冇面嘅同時,又要逼自己融入。要學到所有人都聽唔出自己係客家人。 要我去諗一個理由去說服自己學廣府話而不失霸氣,一定會經過好大掙扎。唯一嘅方法,就係說服自己,粵語只係工具。一隻地位唔及國語嘅工具。 粵語有咩叻?唸詩多幾個字押韻之嘛。 如果用文言文,如果寫官話中文,粵語同客家地位係一樣㗎。所以既然客家話嘅口語你哋唔當係一回事,噉粵語嘅口語,自然都唔使當係一回事!甚至北京話都唔係啲咩!噉樣客家、廣府先可以平起平坐! ==== 喂,打斷自己啲FF先。     我係粵語人。我冇可能用客家人嘅立場去諗嘢。而家我哋就係同大家講,唔使攬炒㗎!客家話俾人睇唔起,粵語都一樣有俾人睇唔起。我覺得兩隻話嘅口語同樣咁緊要,並唔係話一句要保留華夏傳統,就應該摒棄一切文言以外、詩詞經學以外嘅嘢。如果大家連官話發展出嚟嘅書寫體都接受到,點解唔接受用一隻好多人認為係更具古風嘅粵語,發展另一套書寫體出嚟呢?點解大家唔發展本土,係都要執着喺文字上大一統呢?(哼,曹雪芹你寫乜嘢官話,寫出嚟啲嘢日本人韓國人越南人琉球人唔一定睇唔明。點解唔寫文言文?) 當然有個諗法係,粵語人要記低自己嘅諗法,用官話文(即係大家學嘅書面語)已經足夠。噉樣諗嘅人,我俾個練習你做。求其搵篇譯文,將「嘅」轉做「的」,「咗」轉做「了」,睇吓你可唔可以變返做一篇「書面語」出嚟吖。對於母語係廣東話嘅人嚟講,廣東話嘅詞彙、句式、表達,並唔係換一兩隻字咁簡單㗎。

Read More »

悼念六四

June 5, 2016 · 每個香港人一年參加嘅政治活動可能就兩三日。呢幾日嘅政治活動,有儀式、夠多人、夠煽情嘅話,係會改變、塑造到參加者嘅認同。 悼念六四,定係光州事變、盧旺達屠殺、台灣二二八都冇問題。但係大家貼地返少少。本身大部分嘅香港人,民族意識扭曲,冇經歷中國嘅大事但係有中國情懷。難得大家開始醒,開始用返香港人本位去思考,喺呢個時候,支聯會做咗乜? 繼續用儀式去鞏固大家嗰種血統思維。 以悼念為名,去灌輸中國認同。 用獻歌、哭喪形式去洗腦。 抹黑本土思潮,分化香港人。 難得你仲有召集十萬人嘅號召力,並唔係用嚟團結香港人,而係好似一個黑洞噉,將香港人扯返入去「愛中國」呢個無底深潭。純粹悼念冇問題,但係大台每一個環節都不斷鞏固中國意識,根本係用平反六四為名嘅統戰。 我建議下年支聯會向中聯辦申請維穩費,或者有得claim 返錢。

Read More »

夢嘅層次

June 4, 2016 · 【無題】 #輔仁適用 #不過容樂其好耐冇收過文 電影《潛行凶間 (Inception) 》講到[1]主角深入二世祖嘅夢境,就係為咗植入一個概念:拆散老豆間公司。為咗做到呢件事,佢要製造個夢中夢中夢中夢,等二世祖以為喺夢入面見到老豆收埋咗自己張舊相、個舊風車喺夾萬度,等佢覺得可以放心追逐自己嘅夢想。兜個大圈,整一個好似身歷其中嘅夢境,就係為咗改變一個人嗰丁屎咁多嘅諗法。 又記得,微軟 (Microsoft) 當年為咗令大家學識點用踎鼠click嘢,令大家覺得踎鼠可以精準控制指標 [2],整咗個叫踩地雷 (minesweeper) 嘅遊戲;為咗令大家學識點樣拖放 (drag-and-drop) ,就整咗個接龍 (solitaire) 俾大家玩;為咗令大家覺得電腦同電腦之間可以溝通,就整咗傷心小棧 (hearts) 出嚟,等大家連線對戰 [3]。搞咁多嘢,就係想植入幾個概念,教識你少少技巧。做得唔算多,但係好有效。至少玩過接龍嘅人,睇怕呢世都唔會忘記點 drag and drop。 聽過有人話,教育有幾成功,係在於大家喺唔記得晒學過嘅嘢之後,剩返幾多嘢。呢方面其實我哋嘅教育好成功。我哋真係好快唔記晒各個學科嘅知識,但係價值觀呢我哋又呢世都記得住:少做少錯、不要問只要信、抄上一手梗冇死、第一件事搵標準答案、老細話乜就乜。 不過我唔係想講傳統教育嘅潛移默化。我想講打機。 大家細個有冇打機? 以前大家好鍾意打三國志。三國志只係得一個目標:你要消滅一切敵人,跟住去統一中原。無論過程係點,死幾多人,主公民望幾低,冇咗幾多個武將,拖咗幾多年,通通冇所謂。因為統一就係唯一嘅目標,亦係唯一嘅價值。明明管理一個城市,百姓安居樂業,商業繁盛,學術有成就呢啲先至係我哋要嘅嘢。三國志入面唔使理,版圖永遠都係公元二百幾年嘅中國,要完成就一定係打晒所有版面上嘅地方,冇得偏安,冇得鼎立,唔係你死就我亡[4]。三國志係一個好成功嘅遊戲,佢令一代人覺得,要赢就要統一,唔統一版圖就唔叫赢。如果你話光榮(KOEI)老闆收咗 #紅色資金,我堅係會信㗎。 我有啲慶幸後生嗰代鍾意玩 SimCity,鍾意玩 MineCraft,大家喺限制底下,用有限嘅工具去建立自己嘅國度,整一個屬於自己嘅世界出嚟--而唔係喺人哋劃去嘅地圖上面廝殺。 我呢,就好鍾意玩鐵路大亨 (Transport Tycoon) 。我嘅世界好大。我視野範圍會有好多個城市,但係總部 (Headquarter) 淨係可以放喺其中一個城市。行有餘力,我可以去其他地方投資,可以去建設,可以去搵錢。不過世界咁大,時間有限。我得閒,都留返嚟建設我自己地方好過。 ---- [1] 下含劇透。不過你見到呢度我估你都唔小心睇咗我講乜㗎喇。繼續睇啦。 [2] 同埋適當時候拎起隻mouse ⋯⋯ 呢啲都要學㗎 [3] 詳見 https://www.process.st/user-onboarding-process/ [4] 我知道 Age of Empires […]

Read More »

暖男秘密計劃旅行?可能係噉樣開始嘅

June 2, 2016 · 事緣啱啱喺明報突發組見到有個 Winson 準備咩驚喜旅行俾女朋友,拍晒片噉,話準備咗一個星期連M巾都執埋,又好貼心又盛。 (https://www.facebook.com/mingpaoinews/posts/1103234479736686) 我心諗,點解呢啲嘢會上到報紙?正正常常唔好話報紙啦,上香討都冇人理啦。細心諗吓,其實可能係噉樣發生嘅……【睇圖】 呢個時勢,要發掘新聞好易,要整新聞都好似好易。網上日日新鮮,求其搵啲嘢,變做文字,應該已經夠娛樂一大班冇上網,或者淨係接受嘅人。你睇鍾樹根氣勢如虹就知,啲料唔使好堅,掌握到大眾口味,就係王道。氹女又得,搞形象工程亦得。

Read More »