天水圍-食玩瞓旅行天書

May 31, 2016 · 次次去旅行都日本泰國台灣韓國,去到悶悶哋?不如試吓新嘢啦。潮流興窮遊,近年天水圍都成為咗一個新興嘅旅遊熱點,等我同大家介紹吓。 【地理】 天水圍位於香港嘅西北面,總面積只係得4.3平方公里,人口大概30萬。行政上屬於香港,但係實質係國中之國。轄域同香港本土相連,四圍由一道無形嘅圍牆隔住。不過香港同天水圍之間已經有接駁鐵路,港鐵西鐵線朗屏站同兆康站之間,會入一入天水圍嘅範圍,喺該地最南面停站,呢個係入去天水圍最易嘅途徑。另外全港各地都有橫跨兩地嘅巴士,接駁港九新界各區同天水圍。 【出入境】 凡係香港居民,過境無需簽證,亦都冇海關檢查。不過記得帶住身份證明文件。其實天水圍居民要離開天水圍,亦都係帶身份證就得。由於天水圍完全俾香港包圍,要去任何地方,都一定要出一出香港先得。 【語言】 天水圍嘅人嚟自五湖四海,有粵裔、客家、福建、印度、巴基斯坦、北佬等族裔,不過都係以粵裔為主,大部份人日常生活都用廣東話做交流語言,同大部份香港人同聲同氣呀。值得留意嘅係當地雖然有好多講普通話嘅新移民,不過公共交通工具上面都淨係得廣東話同英文,為咗照顧香港嘅遊客,真係落咗唔少心機㗎。另外街上面都係講廣東話嘅為主,唔會似得香港島居民噉,成日講英文。 【貨幣】 由於天水圍冇自己嘅發鈔銀行,所以所有交易都係用港幣或者人民幣。呢度各樣嘢嘅價格都特別平一截,喺度買嘢真係好抵㗎。 【電話】 同香港共用同一個國家編號 +852,手提電話訊號就睇地區,南部會接收到香港訊號,北部就會接收到中國嘅訊號。 (景點?景點一:濕地公園;景點二:新北江商場;景點三:天橋晾衫場;景點四:架空輕鐵站;⋯⋯ 好似好多,我唔寫喇,大家繼續。)

Read More »

小紅帽與大灰狼

May 28, 2016 · 倫爺前排話有學生未聽過呢個童話故事,我覺得可能係呢個故仔唔夠爆、唔夠cult。我咁啱諗到個cult少少嘅故仔,於是就寫咗個新版。歡迎大家每人試寫一個自己嘅版本,等呢個故仔可以流傳落去。 #練筆 #18禁 #不喜勿進 #童話背後 #draft_再修正 村入面住咗兩公婆。 佢哋係由城搬嚟嘅,好似話因為冇乜錢,所以住遠少少,想慳返啲屋租噉話。女嘅叫 Suki ,今年先至廿一歲,俾人搞大咗個肚之後,就搵咗隻兵結婚,扮係奉子成婚。Suki 老公本身係死飛仔,但係為咗老婆,去咗做廠,早出晚歸,都算係幾生性。對從來未做過嘢嘅 Suki 而言,結婚、陀仔嘅生活悶到死,喺屋企睇電視、煲劇,等老公收工。不過都算幸福嘅。 好境不常,喺個肚四個月嘅時候,佢阿媽上嚟問個女攞錢。佢老母好爛賭,上親嚟都問 Suki 借一萬幾千。今次咁啱枱面有一疊一千蚊紙。 「啲錢唔俾得你㗎!要嚟交租㗎!」 「你邊有咁多錢㗎?」 「朋友俾嘅!」 Suki 絕對唔會同自己老母講,村入面有個獵人鍾意玩大肚婆,知道自己大咗肚,就成日搵自己上床,上次仲一次過放低咗十次嘅錢。辛苦錢,點可以輕易放棄呢? 老母隻眼一路望住,蠢蠢欲動,正當老母一手想搶之際,Suki 搵咗把生果刀飛埋去想嚇吓佢,點知一刀插中側頸,頓時血如泉湧。佢呆咗幾分鐘,先意識到發生緊乜事,於是佢打俾獵人。 「喂,我有啲麻煩嘢。上嚟陪我吖?唔計你錢。」 獵人上到去見到情況,見慣大場面嘅佢,同 Suki 講:「唔使驚,每次殺完獵物,我都會搵你上床,今次你殺咗你嘅獵物,我同你慶祝吓!」 喺床上一輪激戰,Suki 已經忘記咗唔夠一個鐘之前,佢先殺咗自己老母。呢個時候,佢老公突然返咗嚟。獵人背對住門口,見唔到其實 Suki 老公拎咗自己把獵槍。 「呯」 獵人瞓咗喺 Suki 身上。 兩公婆於是夾手夾腳,反轉獵人,等佢坐喺床上面,再將地下嘅老女人啲肉一忽一忽咁割落嚟,用刀叉塞落獵人個口度,再用杯?起地下嘅血水。塞唔落,就用地下嘅血水灌,直至地下嘅肉冇咗一半。就好似獵人食食吓人,俾人用槍打死嘅樣。 之後佢哋喺櫃入面,搵咗件灰色嘅大褸,疊咗上獵人身上。Suki 再用獵槍,射咗獵人好多吓。血色同灰色混為一體,都唔知道坐喺度嘅係披住狼皮嘅人,定係披住人皮嘅狼。 「再見喇,阿狼!」 Suki 戴返頂紅色嘅帽,同坐喺床上面唔再識郁嘅獵人道別,之後就同老公離開咗條村,快快樂樂噉生活落去喇。 P.s. 聽講 Suki 老公後來去咗畫童話書,後來就變咗《小紅帽大灰狼》嘅故事喇。

Read More »

《學極都唔識》計劃中止。

May 27, 2016 · 係呀,唔找數呀。我講自己啲失敗經驗冇撚用㗎。一個二個自虐撚嚟㗎。我話我用嗰啲方法白痴叫大家唔好試,你哋就以為我傲嬌;我話自己失敗到貼地,乜撚都唔識,你哋就當我謙。講完啲好方法,大家都係鍾意俾人M,俾啲教科書M,然後士多貢病以為自己俾人滴蠟鞭打好有用,延年益壽。 蒜狗掃把啦。 睇日劇《重版出來》,有個角色做咗漫畫家助手,二十年都出唔到道,到四十歲終於肯正視現實,佢只係想做啲與眾不同嘅嘢,想搵追尋夢想嘅感覺咋。 大家繼續追夢啦。學一樣嘢學幾十年都仲學緊,永續學習,同永續社運一樣,真係好過癮㗎。哈哈。

Read More »

香港旗設計諗頭

May 23, 2016 · 過往嘅旗幟好多時用臂章、龍獅、大鵬金翅鳥、英屬香港旗做基礎。呢啲圖案嘅共通點係——好複雜。一般人冇可能徒手畫出嚟,離遠又睇唔清楚。我睇咗一段關於「旗幟學」 (vexillology)嘅短片,所以就拎起個 keynote 開始畫圖。 香港開埠以來,先後由英國、中華人民共和國支配,所以我用咗英國旗嘅藍色底,同中共嘅紅色。無論之後發生咩變化,我哋都唔應該忘記呢段歷史。 香港係一塊淨土,而呢塊淨土上面,兼容並蓄。呢塊淨土得以維持,係拜英國嘅法治制度所賜。不過只係得制度,唔會抵禦外敵入侵。正中嘅就係一條龍,九龍山嘅形狀,就係一條龍。守護香港唔係靠坐咗喺度嘅獅子山,而係靠蓄勢待發嘅香港人。呢條龍就係香港人嘅象徵。 旗嘅左上方係一片血紅,就代表我哋眾志成城,阻止紅色世界南侵。 #解禁 #代價係一餐大喜屋 #香港旗 —- 忽然諗到啲嘢,所以畫咗幅圖出嚟。大家估唔估到我想表達啲乜? 四隻顏色、形狀、同擺位,好似都有寓意嘅。

Read More »

【派$1500】 (超神奇。Share完先至好睇落去)

May 21, 2016 · 【派$1500】 (超神奇。Share完先至好睇落去)   從前有一個人,佢好有錢,但係冇乜讀過書。佢好欣賞啲識字嘅人,所以每日都拎住一疊一百蚊紙喺火車站前面大嗌,「一舊!一舊!識字嘅就有一舊!」 路過嘅人以為佢係傻嘅,冇人理佢。 其實佢都只不過係想派錢,想鼓勵吓讀書人啫,點解冇人理佢呢?佢返屋企同老婆講,佢老婆就話嘞,「你派一百蚊咁少,食個晏都唔夠啦!」 於是佢第二日去返同一個地方,加碼派夠五百,佢大嗌「五舊!五舊!識字嘅就有五舊!」 結果都係冇人show佢。 佢返到去,佢老婆就話,火車站啲人邊處識字㗎,走私就叻!你搵個好啲嘅地方啦! 於是,佢就上咗一個叫 Facebook 嘅地方,繼續派錢,今次加到一千蚊。都係冇人理佢,1個like都冇。 呢個時候佢遇到我。我見佢有啲心灰意冷,就話嘞,「如果加到 $1500 嘅話,我就幫你宣傳啦!」佢開心到彈起,一口應承咗我! 【而家機會嚟喇,你哋有邊個想攞 $1500?】 好簡單,① 你要 like 同 share 咗呢個 page 先: 港語學主辦:廣東話徵文比賽; ② 你要喺呢個post底下,貼一句「邊有咁大隻蛤乸隨街跳㗎!」就係咁簡單! 不過你都要證明自己識字嘅,做法係寫一篇小說,send 去 cantoncompo@gmail.com 。 我哋會喺來稿入面,揀最好嗰篇,俾呢千五蚊得獎者!快啲參加啦! #廣東話徵文比賽 #爾雅適用 #寫文可以怡情 #未必可以寫到變李嘉誠 #乞求share_post #派錢冇人要 #冇錢收又咁多人寫 #嗟來之食 #聽日一定會好天

Read More »

諧波儀

May 20, 2016 · 科學館以前有個叫「諧波儀」嘅機器。設計好簡單,一塊四角用繩吊住嘅木板,上面晾住張紙,正中係一支固定喺度嘅原子筆。你用手chok塊木板,塊版郁、支筆固定,支筆就會跟住擺動嘅節奏喺紙上面畫出圖案。 塊板越轉越慢,一開始圖案會好闊,但係幅度會慢慢收窄,首先係一個大圈,然後係細幾毫米嘅圈,逐次遞減,一分鐘時間,就會得出一組形狀類近,幅度不一嘅圖案;中途再chok木板,改變擺幅,就可以整到複雜啲嘅花款。畫完出嚟嘅紙樣,就好似藝術品噉,細個每次去都會畫返幾張,拎返屋企珍藏。 後來淨係帶返屋企我都唔滿足,我索性用雪條棍自己整一部出嚟。不過成品太渣,我都係要返科學館至畫到我鍾意嘅圖出嚟。我覺得後來我對規律、符號嘅興趣,或多或少係呢部睇落好無聊嘅機器度嚟。 今年再去科學館,發現舊嗰部諧波儀唔見咗,換咗個晒士得返十分一嘅激光版。新版嘅「筆」,係激光光束。畫完嘅圖案,十秒內就會消失。莫講話帶唔走,連相都影唔切。 換走舊擺設,慳返啲空間,唔知而家啲細路,會帶到啲咩返屋企呢。

Read More »

有人覺得窮一生做一件事,好型

May 19, 2016 · 有人覺得窮一生做一件事,好型;覺得追逐夢想,好威。於是對人對己,難免會事事追求完美。與之對衡嘅,係另一種心態,就係魯迅成日笑嘅「差不多先生」,咩都求其是但,得過且過。我哋呢代人受咗咁多年教育,加之兒時嘅熱血薰陶,最叻嗰班,個個都對求其是但呢種態度深惡痛絕。事實係,兩種睇落相反,一好一壞嘅價值觀,我睇係一樣咁緊要嘅。認真做嘢,聽落冠冕堂皇,係人都識講,但係揀啲嘢去放鬆pun pe,係追求其他嘢嘅先決條件。手就得一對,而人世間嘅事無限,你只可以有啲事求其,去換你其他地方嘅時間出嚟。如果個個執屋洗碗掃地煮飯都一絲不苟,噉大家每日淨係做家務已經夠喇。 #愛就係選擇 #朝早廢噏 #其實本身諗住寫長少少嘅 #不過唔得閒寫落去 #寫文求其係為咗其他嘢完美 #唔做家務藉口 #存參

Read More »

《蚊》

May 16, 2016 · 終於可以停步 終於唔使拍翼 無止境噉飛 不斷去覓食 蜻蜓點水 輕吻一下 一滴  兩滴   三滴    四滴 身體充滿你嘅血液 你一手拍落嚟 將我壓喺牆上 飛唔得起 先識回味 用雙眼感受正眼都未望過嘅你

Read More »

【「台灣旅客」索錢記】

May 10, 2016 · 啱啱喺將軍澳 Popcorn 對出,有兩個女人,一個五十一個三十咁上下,走埋嚟截住我,同我用普通話講:「我們是台灣來的,出了些狀況,想找點吃的。」 我覺得事有蹺蹊,不過我係好人,於是同佢講附近有 snack express,點知佢話「我們出了狀況,想要一些費用。不過請你要保密。」 跟住我話,「過來,我買給你吃。」 聽佢用字其實都覺得佢唔係台灣人㗎喇。 跟住去到 snack express 門口,我用台語問「汝是台灣叨位兮儂,汝是台灣儂是嘸?」,佢就話「對不起,我聽不明白。」我問佢:「hak ga ngin?」佢就話:「你是說 *閩台語* 嗎,不好意思我只說國語。」 我嗰吓真係有啲崩潰,我講客家你就話係閩台。跟住用返普通話問佢「你是哪裡人」,佢話「台Zhong。」我心諗,嗯,有翹舌音嘅台灣人我真係好少見。 咁我係好人嚟?嘛,即刻買咗底雞蛋仔請佢哋食,叫佢哋慢慢食,跟住轉身走入地鐵,我醒起,喂,我明明係要去買燒賣㗎喎,半分鐘後返到原地,佢哋, 手上嘅雞蛋仔已經消失咗,再繼續搵緊其他人攞錢。 為免冤枉無辜,請大家幫我瘋傳,問吓大家有冇類似經歷,如果有將軍澳區嘅朋友幫咗佢哋,而知道對方真係「出了狀況」,我會親口道歉兼請佢哋食飯。

Read More »

為咗保留粵語入聲,你可以去到幾盡?

May 9, 2016 · 講起粵語嘅「懶音」問題,鍾意廣東話嘅朋友對後生仔分唔到三款入聲韻尾(濕 sap/失 sat/塞 sak),覺得好痛心噉話。我都唔算後生,由細到大呢三組字都分得好清楚,所以睇無線新聞,主播一讀錯我都覺得好哽耳。但係印象中「覺得哽耳」同埋「不斷投訴」,係唔可能扭轉語言變化嘅;而過往語常會、優質教育基金資助無數個「粵語正音」嘅計劃,對大家嘅發音影響都係微乎其微。不如我講吓有咩解決方案,等大家唔使十年之後寫新詩哀悼粵語正音息微啦。 語音轉變唔會停嘅。有啲變化一開始,就好似嚿大石碌落山,如果碌到落山腰,你用外力頂住:起欄杆、起牆、人肉頂住⋯⋯都只不過係減慢佢嘅去勢。有啲方法或者可以減慢變化,例如教拼音、搞語音訓練、推廣標準音等等,都不過係用外力頂住噉解。外力始終有限,係用錢同人力堆砌出嚟嘅。大家好快就會發現原來由得嚿石碌落山--即係由得語音轉變--都冇乜大不了。舉個例,粵語王黃同音,大家會叫前者做三劃王,後者做大肚黃,百八變咗同音,大家就避開唔講「百八」而講「一百八十」。所以如果個音真係會合併,一般人唔會抵抗,而係會好快搵一種補救機制出嚟。 噉如果我真係好鍾意粵語嘅入聲,覺得可以保留三款尾音好優雅,可以點做呢? 大家試吓用呢個方向去諗:語音同其他嘢一樣,都係講取捨嘅。正所謂 #愛就係取捨。如果語音區別 X 消失,通常係因為大家覺得其他嘢緊要啲(可以係為咗易讀,亦可能係為咗強調其他部份而犧牲另一啲部份),因此發生咗啲環境上嘅轉變,令到「區分 X」變得好難,或者變得冇需要。即係話如果呢個引發「區別 X 消失」嘅環境轉變已經發生咗,要保留 X,並唔係不斷叫人注意 X 就得,而係要理解語音轉變環環相扣,要向上追溯返 X 消失嘅條件、因素。係咪有 P_1, P_2, … 等等因素導致。 講返 -p / -t / -k 入聲尾。比較返唔同語言,乜嘢語言保留到,乜嘢語言保留唔到? 其實漢語系整體保留得咁差,係因為: ① -p / -t / -k 冇除阻 (release) :你讀完 p 唔會 pu 返出嚟, t 完又冇「池」出嚟, k 完又冇「ka」出嚟。比較吓你讀英文「suck」同廣東話「塞」嘅分別,大概就會明 ② 音節開頭一定有聲母,就算睇落冇其他聲母都會有個喉塞音,前字嘅尾音拉唔到落嚟。好似英文你講「keep on」「put on」「take […]

Read More »