正字表

January 15, 2016 · 我知道坊間有好多亂吹嘅「正字表」、「本字表」,以前我真係會逐個查書反駁,話俾人知點解嗰啲冇可能係本字:可能係近百年嘅新用法、其他粵語嘅方言唔支持、中古音完全唔對應、從來冇人寫過出嚟、字義唔啦更⋯之類。 不過諗深一層,呢啲騎呢用字一般人聽咗都絕對唔會用(大家咁聽話,就唔會寫咁多別字錯字啦係咪?)。反正隻字冇人識,好多又打唔出,根本99%留唔低嘅。真係咁好彩個個都用,咪當佢係新寫法囉。「攰」字呢個寫法,都係咁嚟之嘛。喺林佐翰講之前,大家都係寫「癐」(好似仲有幾個常用寫法)啦,佢一講,大家覺得好,而家變咗標準咁滯添。 再睇返好多唔同語言群體,啲人對自己嘅語言總會有誤解,例如關於正確寫法用法呀,隻字係點嚟呀,咩講法係自己隻話獨有呀,自己隻話點天下最強、最浪漫、最難學、最多字之類。好多擺明係錯嘅嘢,唔知點解係會引起好多共鳴,從而加強大家對隻語言嘅歸屬感㗎噃。既然學者之間冇爭拗,一般人間中聽啲未必係啱嘅嘢,反正識嘅人唔會受影響,同時又會鞏固到一般人嘅認同,算係有賺吖。 我已經睇化咗喇,由得佢啦。

Read More »